Qaraǵandy oblysynda kópqabatty turǵyn úıden órt shyqty

ASTANA. KAZINFORM — Órt sóndirýshiler 4 adamdy qutqardy, dep habarlaıdy Tótenshe jaǵdaılar mınıstrliginiń baspasóz qyzmeti. 

Túnde Qaraǵandy oblysynyń Saran qalasynda úsh qabatty turǵyn úıdiń ekinshi qabatyndaǵy páterden órt shyqty.

Jalyn turmystyq zattar men jıhazdy, sondaı-aq balkondaǵy plastık terezeni sharpydy. Órttiń jalpy aýmaǵy shamamen — 7 sharshy metr.

Oqıǵa ornyna jedel jetken TJM qutqarýshylary baspaldaq marshy arqyly 4 adamdy, onyń ishinde 2 balany evakýatsııalap, úı ishinde qalǵan mysyqty qutqardy. Órtti sóndirý barysynda balkonnan eki gaz ballony shyǵarylyp, jarylystyń aldyn aldy. Órt tolyǵymen sóndirildi.

— Jedel járdem brıgadasy úshinshi qabattaǵy turǵyndy aýrýhanaǵa jetkizdi. Jaǵdaıy qanaǵattanarlyq dep baǵalandy, — delingen habarlamada.

Aıta keteıik, Qostanaı oblysynda qutqarýshylar órt kezinde eki adamdy aman alyp shyqty.