Qaraǵandy oblysynda kómirden gaz óndiretin zaýyt salynady
ASTANA. KAZINFORM – Qaraǵandy oblysynda kómirden jylyna 2 mlrd tekshe metr gaz óndiretin zaýyt salynady. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
– Kómir hımııasy salasynda elimizde shıkizat qory mol. Kómir hımııasyndaǵy kapıtaldy qajet etetin jobalar eksporttaýǵa bolatyn ammıak, metanol, etanol, polıpropılen jáne gaz sııaqty keń aýqymdy taýarlardy óndirýge múmkindik beredi. Áleýetti jobalardyń biri – Qaraǵandy oblysynda jylyna 2 mlrd tekshe metr gaz óndiretin, quny shamamen 2 mlrd AQSh dollaryn quraıtyn kómirden gaz óndirý zaýyty. Atalǵan jobany qytaılyq kompanııa iske asyrýdy josparlap otyr. Bul segmentte kapıtaldy qajet etetin kóptegen eksporttyq jobalardy júzege asyrýǵa bolady, - dedi ol.
Vıtse-premer qaıta óndeý men ártaraptandyrýǵa eleýli serpin berýge ınvestıtsııalar kóleminiń ósimin kórsetýdegi taǵy bir mysal retinde Qarmet keısin atady.
– Kompanııa aldaǵy úsh jyl ishinde shamamen 3,5 mlrd AQSh dollaryna jobalardy iske asyrady. Investıtsııalyq baǵdarlamany iske asyrý nátıjesinde kómir óndirý kólemi 1,4 esege, temir keni óndirisi 1,8 esege ulǵaıa otyryp, kontsentrattar óndirisi 1,7 esege artyp, suryptyq ılemdeý shyǵarý kólemi 2,3 esege ósedi. Sondaı-aq qýaty 4 mln tonna bolatyn jańa quıma-ılek kesheni iske qosylady, - dedi Serik Jumanǵarın.
Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.
