Qaraǵandy oblysynda kómir satatyn oryndar anyqtaldy
QARAǴANDY. KAZINFORM – Qaraǵandy oblysynda aldaǵy jylytý maýsymyna daıyndyq jumystary jalǵasyp jatyr. Sonyń aıasynda turǵyndardy qatty otynmen qamtamasyz etý úshin kómir qory jasaqtalyp, ony satatyn arnaıy oryndar belgilendi.
Qaraǵandy oblysynyń ónerkásip basqarmasynyń málimetinshe, qazirgi tańda óńir turǵyndaryna kómir 47 satý núktesi arqyly usynylady. Onyń 37-si – temirjol tuıyǵy, 10-y – qoıma.
– Jalpy oblys turǵyndaryna kómir 47 satý núktesi arqyly ótkiziledi. Onyń ishinde 37 temirjol tuıyǵy jáne 10 qoıma bar. 2026 jylǵy 25 qyrkúıektegi jaǵdaı boıynsha osy satý oryndaryndaǵy kómir qory 40,9 myń tonnany quraıdy, – dep habarlady Qaraǵandy oblysynyń kásipkerlik jáne ónerkásip basqarmasy.
Kómir satatyn núktelerdiń basym bóligi Qaraǵandy qalasy men Shet aýdanynda ornalasqan. Oblys ortalyǵynda 18 satý núktesi bolsa, Shet aýdanynda 13 núkte jumys isteıdi.
Balqash qalasynda kómir satatyn úsh núkte belgilengen. Temirtaý qalasynda, Abaı, Nura jáne Osakarov aýdandarynda, sondaı-aq Shahtınsk qalasynda eki-ekiden satý núktesi bar.
Qarqaraly aýdanynda bes, Aqtoǵaı aýdanynda alty satý núktesi jumys isteıdi.
Qaraǵandy qalasynda kómir satý máseleleri boıynsha jedel jeli iske qosylǵan. Turǵyndar 8 (7212) 42-15-05 nómiri arqyly qajetti aqparat ala alady. Sonymen qatar oblystyń aýdandary men qalalarynda da jedel jeli telefondary belgilengen.
Kómir satatyn oryndardyń tolyq tizimimen myna silteme arqyly tanysýǵa bolady.
Astanada turǵyndar úshin 14 kómir satý orny jáne 10 qoıma jumys isteıtini habarlanǵan bolatyn.
