Qaraǵandy oblysynda kóktaıǵaqtan 22 jol-kólik oqıǵasy bolyp, 1 jaıaý júrginshi qaza tapty
QARAǴANDY. KAZINFORM – Aýa raıynyń kúrt nasharlaýyna jáne jol qozǵalysy erejeleriniń buzylýyna baılanysty Qaraǵandy oblysynda keıingi táýlikte 22 jol-kólik oqıǵasy tirkeldi. JKO saldarynan jaıaý júrginshi qaza taýyp, taǵy eki adam túrli jaraqat aldy, dep habarlaıdy Kazinform agenttiginiń tilshisi.
Qaraǵandy oblysy PD baspasóz qyzmetiniń habarlaýynsha, saǵat 19:00 shamasynda Lıpetskaıa kóshesinde 53 jastaǵy marshrýttyq avtobýs júrgizýshisi 56 jastaǵy jaıaý júrginshini qaǵyp ketken.
«Jábirlenýshi shuǵyl túrde aýrýhanaǵa jetkizildi, onda dárigerlerdiń barlyq áreketterine qaramastan alǵan jaraqattary saldarynan qaıtys boldy», - dep habarlady vedomstvoda.
Shahtınsk jáne Temirtaý qalalarynda da jol-kólik oqıǵalary bolyp, nátıjesinde eki adam túrli dárejedegi jaraqattarmen aýrýhanaǵa jatqyzyldy.
Ótken táýlikte tirkelgen basqa 19 JKO saldarynan zardap shekkender joq.
«Qaraǵandy oblysynyń polıtsııa departamenti jol qozǵalysynyń barlyq qatysýshylaryn, júrgizýshilerdi de, jaıaý júrginshilerdi de jol qozǵalysy erejelerin qatań saqtaýǵa jáne aýa raıy qolaısyz bolǵan jaǵdaıda, ásirese kóktaıǵaq kezinde saq bolýǵa shaqyrady», - dedi polıtsııa qyzmetkerleri oblys turǵyndaryna.
Esterińizge sala keteıik, keshe túnde Qaraǵandy oblysynda aýa raıynyń qolaısyzdyǵyna baılanysty birneshe jol ýchaskeleri jabyldy.
Osyǵan baılanysty Temirtaý mańyndaǵy tólem pýnktinde keptelis paıda boldy, onda 500-ge jýyq avtokólik jınalyp qaldy.
