Qaraǵandy oblysynda qoǵamdyq kólikte jolaqy tóleýdiń jańa tásili iske qosylady

QARAǴANDY. KAZINFORM - Qaraǵandy oblysynyń bes qalasynda qoǵamdyq kólikte jolaqy tóleýdiń qosymsha tsıfrlyq formaty engiziledi.

3 aqpannan bastap jolaýshylar avtobýstardaǵy jolaqyny bankterdiń mobıldi qosymshalary arqyly ONAY! QR-kodyn paıdalanyp tóleı alady. Jańa múmkindik qoldanystaǵy tólem tásilderin almastyrmaı, jolaýshylarǵa qosymsha qolaıly jaǵdaı usynady.

Jańa tásildi 3-shi aqpannan bastap Qaraǵandy, Balqash, Temirtaý, Saran jáne Shahtınsk qalalarynyń turǵyndary qoldana bastaıdy.

Jolaýshylar avtobýs ishindegi arnaıy stıkerlerde ornalastyrylǵan QR-kodty skanerleý nemese kólik kodyn mobıldi qosymshada engizý arqyly jolaqy tóleı alady. Bul sheshim ONAY! tsıfrlyq platformasynyń fýnktsıonaldyq múmkindikterin keńeıtip, qoǵamdyq kólikti paıdalanýdaǵy servıs deńgeıin arttyrady.

Al jolaqy tóleýdiń dástúrli tásilderi tolyq saqtalady.

Atap aıtqanda, ONAY! kólik kartalarynyń barlyq túrleri — vırtýaldy, biryńǵaı jáne jeńildik kartalar, ONAY! mobıldi qosymshasy, sondaı-aq uıaly baılanys operatory arqyly SMS tólem qyzmeti qoldanysta qala beredi.

– Júıe iske qosylǵannan bergi tórt jyl ishinde jolaýshylarǵa, tasymaldaýshylarǵa jáne jergilikti atqarýshy organdarǵa yńǵaıly ári tıimdi model qalyptasty. ONAY! júıesi óziniń turaqtylyǵy men senimdiligin dáleldedi. Al banktik qosymshalar arqyly tólem engizý – júıeniń kezeń-kezeńimen damýynyń kezekti qadamy, – dedi «Almaty qalasynyń kólik holdıngi» AQ Qaraǵandy oblysy boıynsha fılıalynyń dırektory Andreı Mýstopýlo.

ONAY! júıesi Qaraǵandy qalasynda 2021 jyldyń jeltoqsan aıynda iske qosyldy. Osy ýaqyt ishinde óńirde 326 myń jeńildik kartasy shyǵarylyp, 955 avtobýs pen 7 tramvaıǵa shamamen 1 900 ONAY! termınaly jáne 6 myńǵa jýyq QR-stıker ornatyldy. Búginde oblystyń bes qalasynda 22 avtopark 121 baǵyt boıynsha qyzmet kórsetip otyr.

Eske salsaq, osyǵan deıin Qazaqstan qalalaryndaǵy avtobýs jolaqysynyń quny týraly jazǵan bolatynbyz.