Qaraǵandy oblysynda qysta malǵa shamamen 2 mln tonna shóp qajet

Qys mezgilinde Qaraǵandy oblysyna 1,9 mln tonna shóp qajet bolady. Bul týraly Qaraǵandy oblysynyń ákimi Ermaǵanbet Bólekpaev málimdedi, dep habarlaıdy Kazinform.

Aldyn ala esepteýler boıynsha Qaraǵandy oblysynda 450 myńnan astam iri qara mal, 696 myń bas qoı jáne 311,6 myń bas jylqy bar. Qysqy kezeńde barlyq maldy ustaýǵa shamamen 1,9 mln tonna shóp qajet. Ótken jyly qajetti qor 1,7 mln tonnany qurady. 

— Bıyl óńirde 1,9 mln tonnadan astam shóp bar. Sonymen qatar búgingi tańda 250 myń tonnadan astam saban daıyndaldy. Jem-shóp daıyndaý úshin sharýalarǵa lıtrine 250 teńge baǵamen 3 myń tonnadan astam arzandatylǵan dızel otyny bólindi, — dedi óńir basshysy. 

Jeke qosalqy sharýashylyqtar óz maldaryna shóp daıyndaı alýy úshin memlekettik jáne orman qorynyń jerleri bólindi. Oblystyń 3 orman sharýashylyǵynyń jalpy aýdany 21 myń ga memlekettik orman qoryn quraıdy, onyń ishinde 2 myń ga shabyndyq jáne 19 myń ga jaıylym. 

— Budan basqa, aýyl sharýashylyǵy taýaryn óndirýshilerdi memlekettik qoldaý sheńberinde iri jáne usaq maldyń analyq basynyń jem-shóp qunyn arzandatýǵa 1,5 mlrd. teńge somasyna sýbsıdııalar tólendi, — dep tolyqtyrdy sózin Qaraǵandy oblysynyń ákimi.