Qaraǵandy oblysynda qazannyń sońynda -7°S aıaz kútiledi
QARAǴANDY. KAZINFORM — Qaraǵandy oblysynda qazan aıy klımattyq normadan jylyraq bolady dep boljanyp otyr. Alaıda aı ishinde aýa raıy qubylmaly bolyp, temperatýranyń edáýir aýytqýy, úsik pen jaýyn-shashyn kútiledi.
Sınoptıkterdiń boljamynsha, qazan aıyndaǵy aýanyń ortasha temperatýrasy +5,0…+9,3°S aralyǵynda bolady. Bul klımattyq normadan 1–2°S joǵary. Degenmen aı boıy temperatýralyq jaǵdaı aıtarlyqtaı ózgerip otyrady.
Qazannyń alǵashqy onkúndiginde kún birtindep jylynady. Túngi aýa temperatýrasy 0…+5°S-tan shyǵys aýdandarda +8°S-qa deıin kóteriledi. Topyraq betinde 2°S-qa deıin úsik júrýi yqtımal. Kúndiz aýa temperatýrasy +10…+15°S-tan +15…+20°S-qa deıin joǵarylaıdy.
Odan keıin kún qaıta sýytady. Túngi temperatýra 1…6°S aıazǵa deıin tómendep, kúndiz aýa +6…+11°S-qa deıin jylynady.
Qazannyń ekinshi onkúndiginde de aýa raıy qubylmaly bolady. Túnde aýa temperatýrasy -1…-6°S aıazdan +2…+7°S-qa deıin, kúndiz +6…+11°S-tan +12…+17°S-qa deıin ózgeredi.
Úshinshi onkúndiktiń basynda kúnniń odan ári salqyndaýy kútiledi. Túnde aýa temperatýrasy -1…-6°S-qa deıin tómendep, kúndiz +6…+11°S shamasynda bolady. Keıin kún qaıta jylynady: túnde aýa temperatýrasy +6…+11°S-qa, kúndiz +16…+21°S-qa deıin kóteriledi.
Aı sońyna qaraı aýa temperatýrasy qaıta tómendeıdi. Túnde -2…-7°S-qa deıin sýytyp, kúndiz +5…+10°S bolady.
Oblystyń basym bóliginde qazan aıyndaǵy jaýyn-shashyn mólsheri klımattyq normaǵa saı 8–30 mm shamasynda bolady dep kútiledi. Al óńirdiń ońtústik jartysynda jaýyn-shashyn mólsheri normadan tómen bolady.
Jańbyr qazannyń úshinshi onkúndiginde jıirek jaýady. Aı sońynda jańbyr men qar aralas jaýyn-shashyn túsip, jeldiń jyldamdyǵy sekýndyna 15–20 metrge deıin kúsheıýi múmkin.
Qazannyń úshinshi onkúndiginiń basy men sońynda tuman túsýi yqtımal.
Buǵan deıin qazannyń alǵashqy kúnderinde qaı óńirlerde qar aralas jańbyr jaýatynyn habarlaǵan bolatynbyz.
