Qaraǵandy oblysynda qazan aıyna aýa raıy boljamy
QARAǴANDY. KAZINFORM - Qaraǵandy oblysynda qazan aıy tabıǵattyń alýan qyryn kórsetpek. Jyly da shýaqty kúnderdi sýyq túnder almastyryp, alǵashqy qar men boran da sezilmek.
«Qazgıdromet» mamandarynyń aıtýynsha, aı jalpy klımattyq norma sheginde ótedi, alaıda kúzdiń tosyn minezi de jıi baıqalady.
Qazanda ortasha temperatýra +4,2…+8,8°S deńgeıinde boljanyp otyr. Bul kópjyldyq normaǵa (+3,3…+8,1°S) sáıkes keledi. Jaýyn-shashyn da qalypty mólsherde — 8-den 30 mıllımetrge deıin túsedi dep kútiledi.
Birinshi onkúndik
Aıdyń basy turǵyndardy jyly kúnderimen qýantady. Túngi aýa raıy -3…-8°S men +1…+2°S aralyǵynda aýytqıdy. Al ońtústikte túngi temperatýra +5…+10°S-qa jetedi. Kúndiz aýa +17…+22°S-qa deıin kóteriledi. Degenmen onkúndiktiń sońyna qaraı salqyn túsip, túnde -1…-6°S, kúndiz +8…+13°S shamasynda bolady.
Ekinshi onkúndik
Qazannyń ortasynda aýa raıy qubylmaly bolmaq. Túnde -1…-6°S pen +3…+8°S aralyǵynda bolsa, kúndiz +8…+13°S-tan +18°S-qa deıin jyly bolady. Onkúndiktiń sońynda kún qaıtadan jumsaryp, aýa temperatýrasy +12…+17°S shamasynda kútiledi.
Úshinshi onkúndik
Aıdyń sońynda kúz qysqa ulasyp, alǵashqy qatty sýyqtar bastalady. Túnde -11°S-qa deıin tómendeýi yqtımal. Kúndiz aýa 0…+9°S aralyǵynda saqtalady, keı óńirlerde +13…+18°S-qa, al ońtústikte +21°S-qa deıin kóteriledi. Bul ýaqytta jaýyn-shashyn jıilep, ylǵaldy qar túsýi múmkin.
Sınoptıkterdiń boljamynsha, qazan aıy jeldi bolmaq. Aıdyń birinshi onkúndiginiń sońynda jáne ekinshi jartysynda ekpini 15–20 m/s-qa deıin jetetin qatty jel turady. Úshinshi onkúndiktiń basy men sońynda boran soǵyp, tuman men kóktaıǵaq ta jıi baıqalady.
Qaraǵandy jáne Ulytaý oblystary boıynsha «Qazgıdromet» fılıaly mamandary qazandy kúz ben qystyń toǵysqan erekshe kezeńi dep sıpattaıdy.
– Oblys turǵyndary aýa raıynyń kúrt ózgerisine daıyn bolýy tıis. Jyly kúnder aıaq astynan úsik pen alǵashqy boranǵa aýysýy ǵajap emes, — deıdi sınoptıkter.
Sonymen qatar, mamandar alańdaýǵa negiz joq ekenin de atap ótti.
– Jalpy qazan aıynyń aýa raıy klımattyq normadan aýytqymaıdy. Jaýyn-shashyn da ortasha deńgeıden aspaıdy, — dep naqtylady fılıal ókilderi.
Osyǵan deıin Qaraǵandy oblysynyń Aqtoǵaı aýdanynda qystyń alǵashqy yzǵary sezilip, aýdannyń birneshe aýylynda alǵashqy qar túsip, tabıǵat áp-sátte aq jamylǵany jaıly jazǵan bolatynbyz.