Qaraǵandy oblysynda qaıtarylǵan aktıvter qarajatyna 51 densaýlyq saqtaý nysany salynýda

ASTANA. KAZINFORM -  Elimizde Memleket basshysynyń zańsyz ıemdenilgen aktıvterdi qaıtarý jónindegi tapsyrmalaryn oryndaý boıynsha jumystar jalǵasýda. Qaıtarylatyn qarajat áleýmettik jáne ınjenerlik ınfraqurylymdy damytýǵa baǵyttalady.

Úkimet Qaraǵandy oblysynda 51 medıtsınalyq mekemeniń qurylysy jumystaryn aıaqtaýǵa Arnaýly memlekettik qordan 5,9 mlrd teńge bólý týraly sheshim qabyldady. Nysandar «Aýylda densaýlyq saqtaýdy jańǵyrtý» ulttyq jobasy aıasynda salynýda. Olardy jyl sońyna deıin paıdalanýǵa berý josparlanyp otyr.

Shet, Aqtoǵaı, Abaı, Buqar jyraý, Qarqaraly, Nura jáne Osakarov aýdandarynda jańa dárigerlik ambýlatorııalar, sondaı-aq feldsherlik-akýsherlik jáne medıtsınalyq pýnktter salynady. Olardy júzege asyrý shalǵaıdaǵy eldi mekenderdiń turǵyndary úshin medıtsınalyq qyzmetterdiń qoljetimdiligin arttyrýǵa baǵyttalǵan. Medıtsınalyq qyzmetke qoljetimdilik, aldyn alý jumystary, erte dıagnostıka, sondaı-aq tótenshe jaǵdaılarda alǵashqy kómek kórsetiledi.

«Aýylda densaýlyq saqtaýdy jańǵyrtý» ulttyq jobasy aıasynda 655 nysannyń: medıtsınalyq jáne feldsherlik-akýsherlik pýnktter, dárigerlik ambýlatorııalar qurylysy josparlanǵan. Búgingi tańda 480 nysannyń qurylysy aıaqtaldy. Alǵashqy medıtsınalyq-sanıtarııalyq kómek nysandaryn salýǵa jáne aýrýhanalardy rekonstrýktsııalaýǵa qarajat respýblıkalyq bıýdjetten bólinedi. Sonymen qatar Arnaýly memlekettik qordan da qarjy qarastyrylǵan.

Aıta keteıik, qaıtarylǵan aktıvter esebinen SQO-da balabaqsha salynyp jatyr.