Qaraǵandy oblysynda qaıtarylǵan aktıvter esebinen jańa medıtsınalyq pýnkt ashyldy

ASTANA. KAZINFORM - Memleket basshysynyń tapsyrmasymen Qaraǵandy oblysynda qaıtarylǵan aktıvter esebinen jańa medıtsınalyq pýnkt ashyldy, dep habarlaıdy Úkimettiń baspasóz qyzmeti.

Qaraǵandy oblysy Shet aýdany Eńbekshil aýylynda jańa medıtsınalyq pýnkt jumysyn bastady. Áleýmettik nysan Memleket basshysynyń aýyldyq jerlerdegi ınfraqurylymdy damytý jónindegi tapsyrmasyn júzege asyrý sheńberinde elge qaıtarylǵan zańsyz ıemdenilgen aktıvter esebinen salyndy.

Medıtsınalyq pýnkt 200-den astam turǵynǵa qyzmet kórsetýge arnalǵan jáne zamanaýı qural-jabdyqtarmen jaraqtandyrylǵan. Ǵımaratta dárigerge deıingi qaraý, tekserý jáne em-sharalar kabınetteri bar. Shuǵyl jaǵdaılarǵa jedel den qoıý úshin mekemege aýdandyq aýrýhananyń reanımobıl kóligi bekitilgen.

Shet aýdanynda ashylǵan medıtsınalyq pýnkt óńirde qaıtarylǵan aktıvter esebinen júzege asyrylyp jatqan jalǵyz medıtsınalyq joba emes. Jylandy aýylynda da jańa medıtsınalyq pýnkttiń qurylysy júrip jatyr.

Qaraǵandy oblysynda Arnaýly memlekettik qordan bólingen qarajatqa josparlanǵan 51 medıtsınalyq mekemeniń 24-i salyndy, onyń 11-i paıdalanýǵa berildi. Qalǵan 27 nysannyń qurylysy jalǵasyp jatyr. Olardy tapsyrý bıyl qyrkúıek aıynyń sońyna josparlanǵan.

Jańa medıtsınalyq nysandardy ashý boıynsha jumystar Prezıdent Qasym-Jomart Toqaevtyń bastamasymen qabyldanǵan «Aýylda densaýlyq saqtaýdy jańǵyrtý» ulttyq jobasy aıasynda júrgizilýde. Búgingi tańda 655 jobanyń 540-y júzege asyryldy.

Osyǵan deıin eki jyl ishinde 850 mlrd teńgeniń aktıvteri qaıtarylǵany týraly jazdyq.