Qaraǵandy oblysynda qaıtarylǵan aktıvter esebinen 51 medıtsınalyq nysan salyndy

ASTANA. KAZINFORM – Prezıdenttiń áleýmettik ınfraqurylymdy damytý jónindegi tapsyrmalaryn júzege asyrý sheńberinde Qaraǵandy oblysynda medıtsınalyq ınfraqurylymdy jańartý jumystary júrgizilip jatyr. Óńirdiń jeti aýdanynda 51 medıtsınalyq nysan, atap aıtqanda feldsherlik-akýsherlik pýnktter, dárigerlik ambýlatorııalar jáne medıtsınalyq pýnktter salyndy. Bul týraly Úkimettiń baspasóz qyzmeti habarlady. 

Arnaýly memlekettik qordan 5,9 mlrd teńge kóleminde qarajat bólindi.

Jobanyń basty maqsaty — aýyl turǵyndary úshin medıtsınalyq kómekti qoljetimdi etý jáne onyń sapasyn arttyrý.

Qazirgi ýaqytta qurylys jumystary tolyq aıaqtaldy. Nysandardy medıtsınalyq uıymdardyń balansyna ótkizý úshin qajetti qujattardy rásimdeý jáne sondaı-aq zamanaýı jabdyqtardy jetkizý jumystary júrgizilip jatyr.

Turǵyndar endi medıtsınalyq kómekti anaǵurlym jyldam ári aýdan ortalyǵyna barmaı-aq alýǵa múmkindik týǵanyn atap ótýde.

— Zamanaýı medıtsınalyq pýnkttiń ashylýy biz úshin úlken oqıǵa. Buryn aýdan ortalyǵyna barýǵa týra keletin, al endi bári janymyzda, — dedi Nura aýdany Qaroı aýylynyń turǵyny Kúlken Muhamedjanova.

Jańa medıtsınalyq pýnktte jas maman Sabına Shýlts jumys isteıdi.

— Munda óte jaqsy jaǵdaı jasalǵan. Kabınetter jaryq, zamanaýı qural-jabdyqtar bar. Endi biz turǵyndarǵa jyldam ári sapaly kómek kórsete alamyz, — dep atap ótti meıirbıke.

Nura aýdanynda memleketke qaıtarylǵan aktıvter esebinen barlyǵy 10 nysan medıtsınalyq pýnktter, feldsherlik-akýsherlik pýnktter jáne bir dárigerlik ambýlatorııa salyndy.

Tap osyndaı ózgerister Buqar jyraý aýdanynda da boldy. Munda qaıtarylǵan aktıvter esebinen 13 zamanaýı medıtsınalyq nysan salyndy.

Sondaı-aq qaıtarylǵan aktıvter esebinen Aqtoǵaı aýdanynda toǵyz, Abaı aýdanynda — segiz, Osakarov aýdanynda — bes, Qarqaraly aýdanynda — tórt jáne Shet aýdanynda eki densaýlyq saqtaý nysany salyndy.

Elden zańsyz shyǵarylǵan aktıvterdi qaıtarý jumystary jalǵasyp jatyr.

Prezıdent Qasym-Jomart Toqaevtyń tapsyrmasy boıynsha bul qarajat densaýlyq saqtaý, bilim berý jáne ınfraqurylym salalaryndaǵy áleýmettik mańyzy bar jobalardy júzege asyrýǵa baǵyttalýda. 

Aıta ketelik Bas prokýror Berik Asylov Zańsyz aktıvterdi qaıtarý komıtetiniń Investorlardyń quqyqtaryn qorǵaý komıtetine aınalatyny týraly aıtqan edi.