Qaraǵandy oblysynda kásiporyndar aýmaǵynda alǵash ret saılaý ýchaskeleri ashyldy
QARAǴANDY. KAZINFORM — Qaraǵandy oblysynda alǵash ret úzdiksiz óndiristik tsıklmen jumys isteıtin kásiporyndardyń aýmaǵynda tikeleı saılaý ýchaskeleri ashyldy. Bul jańashyldyq myńdaǵan jumysshyǵa daýys berý kúni jumys ornynan shyqpaı-aq ózderiniń konstıtýtsııalyq quqyǵyn júzege asyrýǵa múmkindik beredi.
Qazaqstan Respýblıkasy Ortalyq saılaý komıssııasynyń tóraǵasy Nurlan Ábdirov 23 tamyzǵa belgilengen Quryltaı depýtattarynyń saılaýyna daıyndyq barysyn tekserý maqsatyndaǵy jumys sapary aıasynda Temirtaýdaǵy «Qarmet» AQ óndiristik nysandary bazasynda qurylǵan № 641 jáne № 642 jańa saılaý ýchaskeleriniń jumysymen tanysty.
Kásiporyndar aýmaǵynda saılaý ýchaskelerin ashý múmkindigi «Qazaqstan Respýblıkasyndaǵy saılaý týraly» Konstıtýtsııalyq zańǵa engizilgen ózgeristerdiń nátıjesinde paıda boldy. Ortalyq saılaý komıssııasy tóraǵasynyń aıtýynsha, mundaı ýchaskeler osy saılaý naýqany barysynda alǵash ret ashylyp otyr jáne olardyń basty maqsaty — úzdiksiz óndiriste eńbek etetin azamattar úshin daýys berý úderisin barynsha qoljetimdi etý.
— Biz daýys berý kúni aýysymda bolatyn zaýyt jumysshylarynyń ózderiniń konstıtýtsııalyq quqyqtaryn dál osy jumys ornynda júzege asyra alatynyna kóz jetkizý úshin keldik, — dedi Nurlan Ábdirov.
Jalpy Qaraǵandy oblysynda osyndaı formattaǵy tórt saılaý ýchaskesi quryldy. Onyń úsheýi Temirtaý men Balqashtaǵy «Qarmet» AQ óndiristik alańdarynda ornalassa, taǵy biri Nura aýdanyndaǵy vahtalyq kentte ashyldy.
№ 642 saılaý ýchaskesinde shamamen 1900 saılaýshy tirkelgen. Ýchaskelik saılaý komıssııasynyń tóraıymy Olga Vasıýtınanyń aıtýynsha, daýys berý kúni kásiporynnyń shalǵaıdaǵy tsehtarynda eńbek etetin qyzmetkerlerdi aldyn ala kelisilgen kestege sáıkes avtobýstarmen tasymaldaý uıymdastyrylady.
— Bul óte qolaıly. Adamdar óndiristen qol úzbeı daýys bere alady. Kóptegen jumysshy tańǵy saǵat jetiden keshki ýaqytqa deıin aýysymmen eńbek etedi jáne ótkizý júıesine baılanysty kádimgi saılaý ýchaskesine baryp úlgermeıtin jaǵdaılar bolady. Endi olar kásiporyn aýmaǵynda daýys berip, keıin qaıtadan jumys oryndaryna jetkiziledi, — dedi ol.
«Qarmet» AQ tseh bastyǵynyń mindetin atqarýshy Ilıa Malıga da bul bastamany qoldaıtynyn jetkizdi.
— Bul bizdiń jáne kórshiles tsehtardyń qyzmetkerleri úshin tıimdi tájirıbe. Jumysshylarǵa kásiporyn aýmaǵynda daýys berý óte yńǵaıly, sondyqtan mundaı bastamany oryndy dep sanaımyn, — dedi ol.
Jumys sapary barysynda Nurlan Ábdirov Qaraǵandy qalasyndaǵy № 16 saılaý ýchaskesinde ornalasqan oqý-modýldik ortalyqta bolyp, múgedektigi bar azamattardyń óz betinshe daýys berýi úshin jasalǵan jaǵdaılarmen tanysty. Ýchaske kótergish qurylǵymen, arnaıy daýys berý kabınalarymen, Braıl qarpimen daıyndalǵan trafarettermen, bıýlletenniń aýdıonusqasymen jáne qoljetimdilikti qamtamasyz etetin ózge de quraldarmen jabdyqtalǵan.
— Biz múgedektigi bar azamattar úshin saılaý ýchaskeleriniń qoljetimdiligin qamtamasyz etýge erekshe kóńil bólinip otyrǵanyn kórip otyrmyz. Kózi kórmeıtin jáne kórý qabileti tómen azamattarmen qatar, tirek-qımyl apparaty buzylǵan adamdarǵa da barlyq qajetti jaǵdaı jasalǵan. Mundaı tásil saılaý quqyǵynyń teńdigi qaǵıdatyn tolyq kórsetedi, — dedi «Qamqor plus» qoǵamdyq birlestiginiń tóraǵasy Nııaz Súndıtalıev.
Sapar aıasynda Ortalyq saılaý komıssııasynyń tóraǵasy jergilikti atqarýshy organdardyń, quqyq qorǵaý qurylymdarynyń jáne memlekettik organdardyń basshylarynyń qatysýymen óńirdiń Quryltaı depýtattarynyń saılaýyna daıyndyq máseleleri boıynsha keńes ótkizdi.
Keńeste saılaý naýqanyn zań talaptaryna sáıkes uıymdastyrý, daýys berý kúni qoǵamdyq tártip pen qaýipsizdikti qamtamasyz etý, sondaı-aq saılaý komıssııalarynyń jumysyn úılestirý máseleleri qaraldy.
Sonymen qatar aýmaqtyq jáne ýchaskelik saılaý komıssııalarynyń músheleri úshin daýys berý kúnindegi jumysty uıymdastyrý tártibine arnalǵan tájirıbelik sabaqtar men testileýdi qamtyǵan oqytý semınary uıymdastyryldy.
Qaraǵandy oblysynda saılaýǵa barlyǵy 639 saılaý ýchaskesi daıyndaldy. Onda ýchaskelik saılaý komıssııalarynyń 4 331 múshesi jumys isteıdi. Saılaýshylar tizimine óńirdiń shamamen 760 myń turǵyny engizilgen.
Buǵan deıin Qoǵamdyq saıasat ınstıtýty júrgizgen saýalnamaǵa saı, respondentterdiń 72,3%-y jańa Quryltaı úshin daýys berýge daıyn ekenin habarlaǵan bolatynbyz.
