Qaraǵandy oblysynda kásipkerlerden birneshe ret para alǵan basqarma basshylary sottaldy

ASTANA. KAZINFORM – Qaraǵandy qalasynyń Qazybek bı aýdandyq soty jemqorlyq qylmystyq quqyq buzýshylyqtary úshin oblystyq memlekettik kirister departamenti basqarmalarynyń basshylary M. Aqbıev, B. Muqashev, sondaı-aq syrtqy ekonomıkalyq qyzmet sýbektileri A. Balatskaıa, H. Bekıshev, N. Bekshın jáne I. Andrıenko sottaldy.

QR Sybaılas jemqorlyqqar qarsy is-qımyl agenttigi baspasóz qyzmetiniń habarlaýynsha, laýazymdy tulǵalar kedendik baqylaý salasyndaǵy jol berilgen buzýshylyqtar boıynsha ákimshilik jaýaptylyqqa tartpaǵany úshin kásipkerlerden birneshe ret para alǵany úshin kináli dep tanyldy.

Aqbıev pen Muqashevke tıisinshe 21,7 mln teńge jáne 2,5 mln teńge kóleminde aıyppul túrinde jaza taǵaıyndaldy.

Osy úkimmen para berýshiler A. Balatskaıa, H. Bekıshev, N. Bekshın jáne I. Andrıenko 540 myńnan 3 mln teńgege deıin aıyppul tóleıdi.

Sonymen qatar, sottalǵandarǵa memlekettik qyzmette jáne kvazımemlekettik sektor sýbektilerinde qyzmet atqarýǵa ómir boıy tyıym salynady.

Sot aktisi zańdy kúshine endi.QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady.

- Sybaılas jemqorlyqqa qarsy is-qımyl agenttigi Memleket basshysynyń tapsyrmasyn oryndaý maqsatynda qoǵamdaǵy zańdylyq pen tártip qaǵıdatyn qamtamasyz etýge erekshe nazar aýdarady, - delingen habarlamada.

Osyǵan deıin Antıkordyń Qazaqstannyń týrızm salasyndaǵy sybaılas jemqorlyq derekterin tekseretini týraly jazdyq.