Qaraǵandy oblysynda qar qursaýynan 400-den astam adam qutqaryldy
QARAǴANDY. KAZINFORM – Bir táýlik ishinde TJM qyzmetkerleri óńir joldarynda aýqymdy qutqarý operatsııasyn júrgizdi. Qar qursaýynda qalǵan kólikter men keptelisterden júzdegen adam, onyń ishinde balalar evakýatsııalandy.
Ótken táýlikte Qaraǵandy oblysynda Tótenshe jaǵdaılar mınıstrliginiń qutqarýshylary avtojoldardaǵy qar qursaýy men kólik keptelisinde qalǵan 407 adamdy evakýatsııalady.
Abaı aýdanynda Astana – Qaraǵandy – Almaty avtojolyndaǵy keptelisten 49 adam Qaraǵandy qalasyna jetkizildi. Olardyń ishinde 5 bala bar.
Qaraǵandy qalasynyń ózinde jabylǵan jol ýchaskesinde TJM-niń 52859 áskerı bóliminiń áskerı qyzmetshileri keptelip qalǵan kólikterden 30 adamdy, onyń ishinde 4 balany evakýatsııalady. Adamdar Temirtaý qalasynyń avtovokzalyna jetkizildi.
Buqar jyraý aýdanynda oblystyq mańyzy bar Qaraǵandy – Doskeı – Toǵyzqudyq – Botaqara avtojolynda qarda turyp qalǵan bes kólikten 20 adam, onyń ishinde 2 bala qutqaryldy. Olar Qaraǵandy qalasynyń avtovokzalyna jetkizildi.
Sondaı-aq osy aýdanda Qyzylorda – Jezqazǵan – Qaraǵandy – Shiderti respýblıkalyq trassasynda Maıózek aýyly mańynda jol jıegindegi kempıngke buzylyp qalǵan jeńil kólikten 9 adam, onyń ishinde 2 bala jetkizildi.
Osakarov aýdanynda Nura – Osakarov oblystyq mańyzy bar avtojolynda qarǵa kómilip qalǵan tórt júk kóligi men bir jeńil kólikten 12 adam, onyń ishinde 2 bala evakýatsııalandy. Olar Osakarov kentine jetkizildi.
Sonymen qatar Osakarov – Molodejnyı jolynda qar qursaýynda qalǵan úsh jeńil kólikten 5 adam Pıonerskoe aýylyna jetkizildi.
Taǵy bir iri jaǵdaı Astana – Qaraǵandy tasjolynda, Oshagandy kenti mańynda tirkeldi. Munda jappaı jol-kólik oqıǵasy bolǵan. Kólikter jınalǵan jerden TJM-niń vahtalyq avtobýstarymen jáne Apattar medıtsınasy ortalyǵynyń brıgadasymen birlesip 111 adam Temirtaý qalasyndaǵy jylytý pýnktteri men medıtsınalyq mekemege jetkizildi. Adamdarǵa ystyq tamaq berilip, qajetti kómek kórsetildi.
TJM málimetinshe, evakýatsııalanǵandardyń eshqaısysy medıtsınalyq kómekke muqtaj bolmaǵan.
Qutqarýshylar óńir turǵyndary men qonaqtaryn qaýipsizdik sharalaryn saqtaýǵa, aýa raıy boljamyn qadaǵalaýǵa jáne qolaısyz aýa raıy kezinde alys jolǵa shyqpaýǵa shaqyrady.
Eske sala keteıik, keshe Qaraǵandy oblysynda qolaısyz aýa raıyna baılanysty trassalarda birneshe jol-kólik oqıǵasy bolǵan edi.