Qaraǵandy oblysynda qansha maıdangerge Jeńis kúnine oraı 5 mıllıon teńgeden berilmek
QARAǴANDY. KAZINFORM — Qaraǵandy oblysynda mamyr aıyndaǵy ataýly kúnder qarsańynda áleýmettik qoldaý sharalary keńeıtilip, túrli sanattaǵy azamattardy qamtý aıasy ulǵaıtyldy. Tólemderdiń kólemi men olar naqty kimderge beriletini sheshildi.
Jeńis kúnine oraı Qaraǵandy oblysynda Uly Otan soǵysy ardagerleri men ózge de sanattaǵy azamattarǵa birjolǵy áleýmettik tólemder qarastyrylǵan. Jalpy qoldaý kólemi 2,1 myńnan astam turǵyndy qamtıdy.
Apparattyq keńeste jumyspen qamtýdy úılestirý jáne áleýmettik baǵdarlamalar basqarmasynyń basshysy Ǵalymjan Spabekovtiń aıtýynsha, qazirgi tańda oblysta Uly Otan soǵysynyń 6 ardageri turady: olardyń beseýi Qaraǵandy qalasynda, bireýi Osakarov aýdanynda. Maıdangerlerdiń árqaısysyna 5 mıllıon teńgeden birjolǵy tólem beriledi.
Tyl eńbekkerlerine, jalpy sany 2 029 adamǵa, 100 myń teńgeden áleýmettik kómek qarastyrylǵan.
Sondaı-aq ózge de sanattaǵy azamattar memleket qoldaýyna ıe bolady:
— kontslager tutqyndary men blokadadaǵy Lenıngrad turǵyndary — 200 myń teńgeden (33 adam);
— qaza tapqan áskerı qyzmetshilerdiń jesirleri men jubaılary — 50 myń teńgeden (89 adam).
Qarajatty tóleý sáýir–mamyr aılaryna josparlanǵan. Buǵan qosa, ardagerlerdi shıpajaı-kýrorttyq emdelýmen qamtý tetigi qarastyrylyp, tıisti qarajat jergilikti bıýdjetterde aldyn ala bekitilgen.
Osyǵan deıin Aqtóbede Jeńis kúnine oraı 4 myńnan astam adamǵa birjolǵy kómek beriletinin habarlaǵan bolatynbyz.
