Qaraǵandy oblysynda ınvestorlarǵa jer berýden zańsyz bas tartqan eki sheneýnik jazalandy

ASTANA. KAZINFORM — Qaraǵandy oblysynda jyl basynan beri prokýratýranyń aralasýymen kásipkerlerge qatysty 906 memlekettik sheshim qaralyp, birqatar zańsyz shekteýdiń joly kesildi. Nátıjesinde bıznes ókilderine jalpy somasy 40 mln teńgeden asatyn aıyppul salýǵa jol berilmedi.

Qaraǵandy oblysynda ınvestorlarǵa jer berýden zańsyz bas tartqan eki sheneýnik jazalandy
Foto: freepik

Prokýratýranyń málimetinshe, «prokýrorlyq súzgi» tetigi arqyly 19 negizsiz tekserý taǵaıyndaý áreketi toqtatylǵan. Sondaı-aq «Saryarqa» arnaıy ekonomıkalyq aımaǵyna qatysýshymen jasalǵan shartty buzýǵa jol berilmedi. Budan bólek, jeti ruqsat qujatyn berýden bas tartý jáne bes ınvestorǵa qatysty shekteý sharalaryn qoldaný toqtatyldy.

Jalpy somasy 40 mln teńgeden asatyn 31 ákimshilik aıyppul salýǵa da jol berilmegen.

Kásipkerlikke zańsyz aralasýdyń jekelegen derekteri boıynsha da shara qabyldandy. Atap aıtqanda, Qaraǵandy qalasy Qazybek bı aýdanynyń prokýratýrasy memlekettik kirister organdarynyń «FLSmidth» JShS-ǵa qatysty tekserýdi prokýratýramen kelispeı taǵaıyndaǵanyn anyqtady.

Prokýrordyń narazylyǵynan keıin tekserý týraly nusqama men oǵan baılanysty sheshimderdiń kúshi joıyldy. Al salyq organynyń laýazymdy tulǵasyna qatysty Ákimshilik quqyqbuzýshylyq týraly kodekstiń 175-babynyń 1-bóligi boıynsha is qozǵaldy.

Sonymen qatar zańdy kúshine engen sot aktilerin taldaý barysynda Qaraǵandy qalasy ákimdiginiń jer ýchaskelerin berýden bas tartý týraly eki sheshiminiń zańsyz ekeni anyqtaldy.

Osy derekter boıynsha eki ákimshilik is qozǵalyp, ÁQBtK-niń 173-babynyń 1-bóligine sáıkes eki laýazymdy tulǵaǵa jalpy somasy 865 myń teńge aıyppul salyndy.

Oblys prokýratýrasy ákimshilik kedergilerdi joıý jáne ınvestorlardyń zańdy múddelerin qorǵaý jumysyn jalǵastyratynyn málimdedi.

Kásipkerler men ınvestorlar zańsyz tekserýlerge, negizsiz shekteýlerge nemese memlekettik organdar tarapynan ózge de zańbuzýshylyqtarǵa tap bolsa, +7 (778-44) 4-66-94, +7 (701) 544-08-59 nómirlerine nemese 115 Call-ortalyǵyna habarlasa alady.

Eske salaıyq, buǵan deıin Qyzylordada ınvestorǵa zańsyz shara qoldanǵan basqarma basshysyna aıyppul salynǵanyn jazǵan edik.