Qaraǵandy oblysynda HOWO júk kólikteri shyǵaryla bastaıdy
ASTANA. KAZINFORM – Taıaý kúnderi Qaraǵandy oblysynyń Saran qalasynda HOWO júk tehnıkasyn shyǵaratyn jańa óndiris iske qosylady. Bul týraly Úkimet otyrysynan keıingi baspasóz máslıhatynda Ónerkásip jáne qurylys vıtse-mınıstri Oljas Saparbekov aıtty.
- Búginde iske asyrý josparlanǵan 200 jobanyń 125-i júzege asyryldy, qalǵan jobalar aıaqtalý satysynda. Keıbirinde jabdyqtardy iske qosý-baptaý jumystary júrgizilip jatsa, endi birinde qurylys-montaj jumystary aıaqtalyp keledi, - dedi ol.
Vıtse-mınıstr negizgi jobalardyń qatarynda Qaraǵandydaǵy Karaganda Insulation kompanııasynyń jylý oqshaýlaǵysh materıaldar óndirisiniń, atalǵan oblysta alıýmınıı jáne bımetall radıatorlar, maılaý materıaldaryn óndirý jobalarynyń iske qosylǵanyn aıtty.
- Aldaǵy kúnderi Qaraǵandy oblysynyń Saran qalasynda HOWO júk tehnıkasyn shyǵaratyn jańa óndiristi iske qosý josparlanyp otyr. Jalpy, jobalardyń birqatary ishki naryqtyń qajettiligin qamtamasyz etýge baǵyttalǵan. Sonymen qatar eksportqa shyǵarýǵa áleýeti bar baǵyttar da bar. Biz mundaı jobalardy qoldaımyz jáne olarǵa jan-jaqty kómek kórsetýge daıynbyz. Bıyl josparlanǵan 200 jobanyń barlyǵy ýaqytyly júzege asyrylýy úshin jumys istep jatyrmyz, - dedi Oljas Saparbekov.
Aıta keteıik, Premer-mıınstr Oljas Bektenov elimizde qurastyrylatyn júk kólikteriniń álemdik brendterin ataǵan edi.