Qaraǵandy oblysynda hokkeıshi muz aıdynynda kóz jumdy
QARAǴANDY. KAZINFORM — Qaraǵandy qalasynda ótken áýesqoı hokkeıshiler kezdesýi qaıǵyly aıaqtaldy. Match bastalmaı jatyp, oıynshylardyń biriniń jaǵdaıy kúrt nasharlaǵan. Kórsetilgen alǵashqy kómekke qaramastan, er adamdy aman alyp qalý múmkin bolmady.
Qaıǵyly oqıǵa ótken senbi kúni Túngi áýesqoı hokkeı lıgasy aıasyndaǵy match kezinde tirkelgen. Oıyn is júzinde bastalyp úlgermegen: saltanatty sapqa turý barysynda hokkeıshilerdiń biri esinen tanyp, muz aıdynyna qulaǵan.
Lıga ókilderiniń málimetinshe, oqıǵa ornynda bolǵandar aldymen alǵashqy medıtsınalyq kómek kórsetýge árekettengen, keıin jedel járdem brıgadasy shaqyrylǵan. Alaıda dárigerler kelgenge deıin er adam kóz jumǵan.
— Oıynshy matchtyń basynda, sapqa turý kezinde kenetten ózin jaısyz sezindi. Ol esinen tanyp, qulap tústi. Ókinishke qaraı, kómektese almadyq, — dedi hokkeı lıgasynyń basshysy Konstantın Spıtsyn.
Qaraǵandy oblysynyń densaýlyq saqtaý basqarmasy atalǵan aqparatty rastady.
— Er adam jedel járdem brıgadasy kelgenge deıin qaıtys bolǵan. Feldsherler ólim faktisin ǵana tirkedi, — dep málimdedi vedomstvo.
Belgili bolǵandaı, marqum 46 jasta bolǵan. Ol «SKA-Prıozersk» komandasynyń oıynshysy, Reseı Federatsııasynyń azamaty. Qaraǵandy qalasyna qyzmettik issaparmen kelgen.
Uıymdastyrýshylardyń aıtýynsha, ol kásibı sportshy bolmaǵan — ózge qatysýshylarmen birge jumys kúninen keıin áýesqoı matchqa qatysqan.
Er adamnyń qaıtys bolý sebepteri ázirge jarııalanǵan joq. Oqıǵanyń barlyq mán-jaıy anyqtalyp jatyr.
Eske salsaq, Óskemende hokkeıshi ólimine qatysty sot úkimi shyqqan bolatyn.