Qaraǵandy oblysynda GRES-ke 55 mıllıon teńge aıyppul salyndy
QARAǴANDY. KAZINFORM — Qaraǵandy oblysynyń mamandandyrylǵan tabıǵatty qorǵaý prokýratýrasy óńirdegi ekologııalyq jaǵdaıdy baqylaý barysynda «GRES Topar» JShS tarapynan zań buzýdy anyqtady.
Topar kentinde júrgizilgen tekserý barysynda kásiporynnyń sýarý jáne kúl úıindileriniń ýchaskelerin kezeń-kezeńmen qurǵatý kezinde ekologııalyq talaptardy saqtamaýy saldarynan aýanyń shamadan tys shańdanýy tirkeldi.
Qaraǵandy oblysynyń Ekologııa departamentine «Prokýratýra týraly» Konstıtýtsııalyq zańnyń 26-babyna sáıkes tekserý júrgizý týraly talap joldandy.
— Ekologııa departamenti júrgizgen tekserý zań buzýshylyq faktilerin rastady. Kúl úıindisin rekýltıvatsııalaý qorshaǵan ortaǵa shyǵarýǵa ruqsatsyz jáne memlekettik ekologııalyq saraptamanyń oń qorytyndysynsyz júrgizilgeni anyqtaldy, — delingen Qaraǵandy oblysynyń prokýratýrasy habarlamasynda.
Tekserý qorytyndysy boıynsha «GRES Topar» JShS-ǵa 55 mıllıon teńge aıyppul salyndy.
Mamandandyrylǵan tabıǵatty qorǵaý prokýratýrasy ekologııalyq zańnamanyń saqtalýyn jáne anyqtalǵan buzýshylyqtardy joıý boıynsha sharalar qabyldaýdy qadaǵalaýdy jalǵastyrady.
Aıta ketelik Qaraǵandyda zańsyz jekeshelendirilgen mektep ǵımaraty men jer telimi memleketke qaıtarylǵan edi.