Qaraǵandy oblysynda esirtki saýdasymen aınalysqan ınternet-dúken ıesi ustaldy

QARAǴANDY. KAZINFORM – Qaraǵandy oblysynda esirtkiniń zańsyz aınalymyna qarsy baǵyttalǵan jedel is-shara barysynda polıtseıler iri ınternet-dúken ıesin ustady.

«Qarasora» jedel operatsııasy kezinde Temirtaý qalasynda 20 jastaǵy jergilikti turǵyn qolǵa tústi. Ol ınternet arqyly esirtki zattaryn taratty degen kúdikke ilingen.

Jeke tintý barysynda kúdiktiden eki iPhone markaly uıaly telefon, 200 000 teńge kóleminde aqsha, salmaǵy shamamen 2 gramm bolatyn untaq tárizdi zat tabylyp, tárkilendi.

Al turǵylyqty mekenjaıyna júrgizilgen tintý kezinde jalpy salmaǵy shamamen 100 gramm bolatyn aqshyl sary tústi untaq salynǵan 51 túıinshek anyqtaldy.

- Tergeý barysynda ustalǵan azamattyń esirtki satýmen aınalysqan ınternet-dúkenniń ıesi ekeni dáleldendi. Ol tórt aı boıy zańsyz qyzmetin júrgizip, tyıym salynǵan zattarǵa tólemdi krıptovalıýta arqyly qabyldap otyrǵan. Sondaı-aq kúdiktiniń qala aýmaǵynda birneshe «jasyryn oryndar» («zakladka») uıymdastyrǵany belgili boldy, - delingen aqparatta.

Qazirgi ýaqytta polıtseıler atalǵan qylmysqa qatysy bar ózge tulǵalardy anyqtaýǵa baǵyttalǵan tergeý amaldaryn jalǵastyrýda.

Kúdikti ýaqytsha ustaý ızolıatoryna qamaldy.

Aıta keteıik, Qaraǵandyda týrıstik kompanııa 34 azamattyń 52 mıllıon teńgesin qoldy qylyp, aldap soqqan.