Qaraǵandy oblysynda «Eńbek» mekemesiniń eks-basshylary 449 mln teńge jymqyrǵan

QARAǴANDY. KAZINFORM — QMA Qaraǵandy oblysy boıynsha departamenti «Eńbek» RMM fılıalynyń burynǵy basshylaryna qatysty asa iri kólemde bıýdjet qarajatyn jymqyrý faktisi boıynsha tergeý júrgizip jatyr. 

2021-2023 jyldary RMM jáne onyń aımaqtyq fılıaly «bir kózden satyp alý» ádisimen kıim jáne aıaq kıim óndirisine arnalǵan bylǵary jáne trıkotaj shıkizatyn jetkizýge 23 kelisim-shart jasaǵan.

Alaıda, taýarlar jetkizilmegen, 449 mln teńge bıýdjet qarajaty urlanǵan.

— Qylmystyq kiristi zańdastyrý maqsatynda kúdiktiler zańmen belgilengen aqshany qolma-qol aınaldyrý shegin aınalyp ótip, kásibı aqsha jylystatýshynyń qyzmetin paıdalanǵan. Ol aqshany bólip, óziniń baqylaýyndaǵy 4 jeke kásipkerdiń atynan kıim jáne aıaq kıim tigýge arnalǵan taýar jetkizý týraly jalǵan kelisimder jasaǵan. Atalǵan kelisimder men tólem qujattary negizinde 122 mln teńge qarajat qolma qol aqshaǵa aınalǵan, — delingen habarlamada.

Jeńil jolmen tapqan tabysyna Almaty qalasynan jeke úı men «BMW X6» avtokóligi satyp alynǵan, olardy yqtımal tárkileýden jasyrý úshin senimdi tulǵalarǵa resimdegen.

Atalǵan múlikke sottyń sanktsııasymen tyıym salyndy.

Kúdiktiler 2 aıǵa qamaýǵa alyndy.

Qylmystyq is júrgizý kodeksiniń 201-babyna sáıkes basqa aqparat jarııalanbaıdy.

Eske sala keteıik, buǵan deıin Atyraýda qylmystyq top quryp, salyq tóleýden jaltarǵan kúdiktige izdeý jarııalanǵan bolatyn.