Qaraǵandy oblysynda elektr jelileriniń 70 paıyzy tozǵan
Óńir basshysy Ermaǵanbet Bólekpaev ÓKQ brıfınginde elektr jelileri qatty tozǵan jáne jetkizýshilermen qıyndyqtar týyndaǵan eń osal aýdandar men qalalardy atap ótti, dep habarlaıdy Kazinform tilshisi.
RSK brıfınginde Qaraǵandy oblysynyń ákimi Ermaǵanbet Bólekpaev óńirdegi elektr jelileriniń tozýyna qatysty problemalarǵa toqtaldy. Onyń aıtýynsha, oblystaǵy jelilerdiń shamamen 70%-y eskirgen.
«Tozý deńgeıi óte joǵary, shamamen 70%. Bizdiń oblysta elektr jelileri shamamen 18 000 km. Óńirde 4 iri elektrmen jabdyqtaýshy uıym jumys isteıdi. Olardyń tarıfteri ulǵaıtyldy. Bul kompanııalarǵa elektr jelileriniń tozýyn azaıtý jáne jańartý boıynsha barynsha qarqyndy jumys isteý mindetteri qoıyldy», - deıdi oblys ákimi.
Óńir basshysy eń problemaly uıymdar men aýdandarǵa da toqtaldy.
«KREK – Qaraǵandy óńirlik elektr kompanııasynyń jumysy úlken alańdaýshylyq týǵyzdy. Ol Temirtaý qalasynda ornalasqan. Kompanııa negizinen bizdiń úsh aýdanymyzda jumys isteıdi: Qarqaraly, Nura, Osakarov jáne Buqar jyraý aýdanynyń bir bóligi. Biz olarmen únemi baılanystamyz, baqylaýda ustap otyramyz. Atalǵan mekemeniń jumysyna Qarqaraly aýdanyna saparym kezinde kóptegen shaǵym tústi. Jaǵdaıdyń ýshyqqany sonsha, tipti Qaraǵaılyda elektrık te bolmaǵan», - deıdi Ermaǵanbet Bólekpaev.
Elektrıkter tapshylyǵynyń basty sebebi – jalaqynyń tómendigi. Osy máseleni eskere otyryp, bul sala qyzmetkerleriniń jalaqysyn aıtarlyqtaı kóterý týraly sheshim qabyldanǵan. Elektr qýatymen qamtamasyz etý salasynda sondaı-aq materıaldyq-tehnıkalyq jabdyqtaý da jetildirile bastady. Óńir basshysynyń aıtýynsha, qazir oń dınamıka baıqalady. Biraq áli de problemalyq kásiporyndar bar.
«Bizde «Shet Energo» kásiporny áli de negizgi problemalyq másele bolyp qalyp otyr. Aty shýly kompanııa. Ókinishke qaraı, ol sońǵy 20 jyl ishinde elektr jelilerin jańartýǵa múldem esh qarjy salmaǵan. Bul turǵyda kóptegen sot protsesi júrip jatyr. Aıyppuldar da, ótemdik tarıfter de boldy. Qazir monopolııaǵa qarsy komıtet pen energetıka qadaǵalaý departamenti bul máselemen aınalysyp jatyr. Bul kompanııaǵa Shet aýdany men Aqtoǵaı aýdanynyń shamaly bóligi qarasty. Biz bul jaǵdaımen ári qaraı aınalysatyn bolamyz», - dedi Qaraǵandy oblysynyń ákimi.
Eske sala keteıik, qyrkúıektiń sońynda Qaraǵandy qalasy tolyqtaı jaryqsyz qalǵan. Kenshiler shaharynda elektr qýatynyń óshýine JEO-3-te tehnologııalyq aqaý sebep bolǵan.
