Qaraǵandy oblysynda ekologter shahtaǵa 2 mln teńge aıyppul saldy
QARAǴANDY. KAZINFORM — Qaraǵandy oblysynda Ekologııa departamentiniń mamandary «Karaganda Komir» JShS-ne qarasty «Saran» shahtasynda ekologııalyq talaptardyń qaıtadan buzylǵanyn anyqtady. Jospardan tys tekserý qorytyndysy boıynsha kásiporyn ákimshilik jaýapkershilikke tartyldy.
Jospardan tys tekserýdi Qaraǵandy oblysy boıynsha Ekologııa departamenti júrgizdi.
Vedomstvo málimetinshe, Soqyr ózenine aǵyzylatyn sarqyndy sýlarǵa júrgizilgen zerthanalyq taldaý barysynda nıtrıtterdiń ruqsat etilgen shekti kontsentratsııasynyń asyp ketkeni anyqtalǵan. Belgilengen normatıv 0,096 mg/dm³ bolsa, is júzinde lastaýshy zattyń mólsheri 0,330 mg/dm³-di qurap, ruqsat etilgen deńgeıden 3,4 eseden astam joǵary bolǵan.
Departamenttiń habarlaýynsha, dál osy tógindi kózi boıynsha osyndaı zańbuzýshylyq 2026 jyldyń sáýir aıynda da tirkelgen. Qaıtalanǵan zańbuzýshylyq ekologııalyq zańnama talaptarynyń saqtalmaǵanyn kórsetedi.
Tekserý nátıjesinde kásiporynǵa qatysty ákimshilik is qozǵaldy. Sonymen qatar anyqtalǵan zańbuzýshylyqtardy joıý týraly nusqama berilip, 2 190 719 teńge kóleminde ákimshilik aıyppul salyndy.
Buǵan deıin SQO-da bıyl ekologııa zańnamasyn buzǵandarǵa 21 mln teńgeden astam aıyppul salynǵanyn habarlaǵan bolatynbyz.
