Qaraǵandy oblysynda ekologııalyq zań buzýshylyqtarǵa 57 mln teńgeden astam aıyppul salyndy
QARAǴANDY. KAZINFORM - Qaraǵandy oblysynda jyl basynan beri júrgizilgen ekologııalyq baqylaý sharalarynyń nátıjesinde júzdegen zań buzýshylyq anyqtalyp, ondaǵan mıllıon teńge kóleminde aıyppul salyndy. Sonymen qatar óńirdegi stıhııalyq qoqys oryndaryn joıý jumystary jalǵasyp jatyr: anyqtalǵan 500 nysannyń 479-y tazartyldy.
Jyl basynan beri Qaraǵandy oblysynda 100 kásipkerlik sýbektisine qatysty tekserý júrgizildi. Onyń ishinde mamandar nysandardy aralap, 15 profılaktıkalyq baqylaý, 73 jospardan tys tekserý jáne ruqsat berý talaptaryna sáıkestigin anyqtaý maqsatynda 12 tekserý ótkizdi.
Tekserý qorytyndysynda ekologııalyq zańnama talaptarynyń 331 ret buzylǵany anyqtaldy. Zań buzýshylyqtardy joıý jóninde 173 nusqama berilip, onyń 142-si oryndaldy. Quqyq buzýshylarǵa qatysty 244 ákimshilik yqpal etý sharasy qoldanyldy. Onyń ishinde 73 jaǵdaıda eskertý jasaldy.
— Bizdiń mindetimiz — zań buzýshylyqty anyqtap, aıyppul salýmen ǵana shektelý emes. Eń mańyzdysy — anyqtalǵan kemshilikterdiń joıylýyn qamtamasyz etip, olardyń qaıtalanýyna jol bermeý. Sondyqtan berilgen nusqamalardyń oryndalýy jeke baqylaýǵa alynǵan, - dep habarlady Qaraǵandy oblysy boıynsha Ekologııa departamenti.
Sotqa 19 materıal joldandy. Sot sheshimderi boıynsha salynǵan ákimshilik jazalardyń jalpy somasy 57,5 mln teńgeni qurady. Budan bólek, ýákiletti organ jalpy somasy 114,6 mln teńge bolatyn 152 aıyppul salý týraly qaýly shyǵardy. Atalǵan soma tolyq óndirildi.
Óńirde ruqsat etilmegen qoqys oryndaryn joıý baǵytyndaǵy jumystar da jalǵasyp keledi. «NK «Qazaqstan Ǵarysh Sapary» AQ málimetinshe, oblys aýmaǵynda 500 stıhııalyq qoqys orny anyqtalǵan. Búginde olardyń 479-y, ıaǵnı 96%-y joıyldy. Qalǵan 21 qoqys ornyn joıý jumystary jalǵasyp jatyr.
— Qoqys oryndaryna qatysty máseleni sheshý úshin qalyptasqan lastaný oshaqtaryn tazartý jetkiliksiz. Eń bastysy — olardyń qaıta paıda bolýyna jol bermeý. Bul úshin jergilikti atqarýshy organdar tarapynan da, turǵyndar tarapynan da turaqty baqylaý qajet, - dep atap ótti departament ókilderi.
Vedomstvonyń málimetinshe, ekologııalyq baqylaý sharalary 2026 jyldyń sońyna deıin jalǵasady.
Buǵan deıin Batys Qazaqstanda ekologııa salasynda 115 zań buzýshylyq anyqtalǵanyn habarlaǵan bolatynbyz.
