Qaraǵandy oblysynda ekologııalyq ahýal kúrdeli: aýaǵa 293,7 myń tonna zııandy zat taraǵan
QARAǴANDY. KAZINFORM — Qaraǵandy oblysynda ekologııalyq ahýalǵa qatysty kórsetkishter alańdatarlyq kúıde qalyp otyr. Jyl basynan beri óńirde aýanyń joǵary deńgeıde lastanýynyń 232 jaǵdaıy tirkelse, sý nysandarynan osyndaı 31 derek anyqtalǵan.
Qańtar-qyrkúıek aılarynda oblys aýmaǵynda atmosferaǵa taraǵan lastaýshy zattardyń kólemi 293,7 myń tonnaǵa jetti. Al sý nysandaryna tógilgen lastaýshy zattardyń kólemi 79,03 myń tonnany qurady.
«Qazgıdromet» RMK málimetinshe, esepti kezeńde aýa men sý sapasyna júrgizilgen baqylaý nátıjesinde joǵary deńgeıde lastanýdyń atalǵan derekteri tirkelgen. Normatıvten asyp ketý jaǵdaılary boıynsha tıisti baqylaý sharalary qolǵa alynǵan.
Zerthanalyq baqylaý aıasynda mamandar 4 294 synama alyp, 9 392 taldaý júrgizdi.
Óńirdegi ónerkásip kásiporyndarynda shyǵaryndylar men tógindilerdi avtomatty túrde baqylaý júıelerin ornatý jumystary jalǵasyp jatyr. Qazir mundaı jabdyq segiz kásiporynnyń shyǵaryndylar kózderine ornatylǵan. Taǵy eki kásiporynda júıeler ishinara engizilse, eki kásiporynda montajdaý jumystary josparlanǵan.
Sonymen qatar oblys kásiporyndary tabıǵatty qorǵaý sharalaryna 1,4 mlrd teńgeden astam qarajat baǵyttaǵan.
Buǵan deıin Óskemendegi kásiporyn aýaǵa taraıtyn zııandy shyǵaryndylar normasyn asyryp jibergeni jaıly habarlaǵan bolatyn.
