Qaraǵandy oblysynda ekologııa zańnamasyn buzǵan kompanııaǵa 313,9 mıllıon teńge aıyppul salyndy
QARAǴANDY. KAZINFORM - Qarqaraly aýdanynyń prokýratýrasy turǵyndardyń aryz-shaǵymdary boıynsha ekologııalyq zańnamanyń saqtalýyna tekserý júrgizdi.
«Altaı Polımetally» JShS (budan ári – Seriktestik) sarqyndy sýlardy ashyq jerge aǵyzatyny anyqtaldy.
Tekserý ótkizý úshin aýdan prokýrory oblystyq Ekologııa departamentine talap joldady.
Nátıjesi kásiporynnyń Ekologııalyq kodeks normalaryn buza otyryp, memlekettik ekologııalyq saraptamasyz jáne qaldyqtardy qorshaǵan ortaǵa shyǵarýǵa ruqsatsyz jumys istegenin kórsetti.
Qarqaraly aýdandyq soty kompanııany kináli dep tanyp, oǵan QR ÁQBtK-niń 332-babynyń 1-bóligi jáne 328-babynyń 1-bóligi boıynsha 313,9 mln teńge aıyppul saldy.
Sonymen qatar, sot oryndaýshysy Seriktestiktiń aǵyndy sýlardy bıologııalyq tazartý kesheniniń jumysyn buzýshylyqtar joıylǵanǵa deıin toqtatty.
