Qaraǵandy oblysynda eki aptada JRVI juqtyrǵandar sany 12 myńnan asty
QARAǴANDY. KAZINFORM – Qazan aıynyń basynan beri óńirde maýsymdyq respıratorlyq ınfektsııalardyń taralýyna turaqty monıtorıng júrgizilip keledi. Aýyrǵandardyń basym bóligi balalar bolǵandyqtan, mamandar turǵyndardy saqtyq sharalaryn ustanyp, tumaýǵa qarsy ekpeni ýaqytyly alýǵa shaqyrady.
2026 jylǵy 1-15 qazan aralyǵynda Qaraǵandy oblysynda jedel respıratorlyq vırýstyq ınfektsııanyń (JRVI) 12 404 jaǵdaıy tirkeldi. Aýyrǵandardyń jalpy sanynyń 58%-yn 14 jasqa deıingi balalar quraıdy.
Qaraǵandy oblysynyń sanıtarııalyq-epıdemıologııalyq baqylaý departamentiniń málimetinshe, epıdemııalyq maýsym bastalǵaly beri JRVI men tumaýǵa shaldyǵý kórsetkishterine kún saıyn monıtorıng júrgizilip jatyr.
Dúnıejúzilik densaýlyq saqtaý uıymynyń boljamyna sáıkes, bıylǵy epıdemııalyq maýsymda tumaý vırýsynyń A (H1N1), A (H3N2) jáne B degen úsh shtamy aınalymda bolady dep kútilýde. Olardyń barlyǵy tumaýǵa qarsy vaktsınanyń quramyna engizilgen.
– Vaktsınatsııa – tumaý men onyń asqynýlarynyń aldyn alýdyń negizgi tásilderiniń biri. Ásirese aýrýdyń aýyr ótý qaýpi joǵary jáne ınfektsııaǵa osal adamdardyń ekpeni ýaqytyly alǵany mańyzdy, - dedi departament basshysy ıÝrıı Zalygın.
Qaraǵandy oblysynda tumaýǵa qarsy egý naýqany jalǵasyp jatyr. Búgingi tańda 25 myńnan astam adam vaktsına alǵan. Bıyl jergilikti bıýdjet esebinen Reseıde óndirilgen «Grıppol» vaktsınasynyń 173 myń dozasy satyp alynǵan.
Tegin vaktsınatsııa dıspanserlik esepte turǵan balalar men eresekterge, balalar úıleri men náresteler úıleriniń tárbıelenýshilerine, qarttar úılerinde turatyn adamdarǵa, medıtsına qyzmetkerlerine, sondaı-aq epıdemıologııalyq kórsetilimder boıynsha ekpe alýǵa jatatyn ózge de azamattarǵa júrgiziledi. Olardyń qatarynda júkti áıelder, pedagogter, áskerı qyzmetshiler, júrek-qantamyr júıesi men tynys alý aǵzalarynyń sozylmaly aýrýlary bar adamdar jáne 65 jastan asqan azamattar bar.
Vaktsınatsııa tumaýdyń aýyr ótýi men asqyný qaýpin azaıtýǵa, sondaı-aq eńbek ujymdarynda ınfektsııanyń taralýyn tejeýge kómektesedi. Osyǵan baılanysty uıym basshylaryna qyzmetkerlerdi jumys berýshiniń qarajaty esebinen tumaýǵa qarsy egý múmkindigin qarastyrý usynylady.
Mektepterde ınfektsııanyń taralýyna qalaı tosqaýyl qoıylady?
Sanıtarııalyq qyzmetter balalar ujymdaryndaǵy epıdemıologııalyq jaǵdaıǵa erekshe nazar aýdaryp otyr. Qazirgi ýaqytta oblys mektepterinde bir synyptaǵy JRVI-men syrqattanýshylyq kórsetkishi epıdemııalyq shekten 20% jáne odan da kóp asqan jaǵdaı tirkelmegen.
Medıtsınalyq uıymdarda JRVI men tumaý belgileri bar naýqastardy anyqtaýǵa arnalǵan súzgiler jumys isteıdi. 1 qazannan bastap medıtsına qyzmetkerleri úshin maska taǵý rejımi engizildi. Mektepke deıingi uıymdarda kún saıyn tańerteńgi súzgi júrgizilip, respıratorlyq ınfektsııa belgileri bar balalardyń ujymǵa kelýine jol berilmeıdi.
Eger bir ınkýbatsııalyq kezeń ishinde synyp oqýshylarynyń 20-30%-ynan JRVI belgileri anyqtalsa, kabınettik oqytý júıesin ýaqytsha toqtatyp, jeti kúntizbelik kún boıy synypqa jańa oqýshylardy qabyldamaý usynylady. Al aýyrǵandar sany synyptaǵy oqýshylardyń jalpy sanynyń 30%-yna nemese odan da kóp mólsherine jetse, oqytý qashyqtan júrgiziledi.
– Aýrý juqtyrǵandardy der kezinde anyqtap, ınfektsııanyń uıymdasqan ujymdarda taralýyna jol bermeý mańyzdy. Balada aýrýdyń alǵashqy belgileri baıqalsa, ony úıde qaldyryp, dárigerge qaralý qajet, - dep atap ótti ıÝrıı Zalygın.
Balalardy JRVI men tumaýdan qalaı qorǵaýǵa bolady?
Mamandar úı-jaılardy únemi jeldetip, ylǵaldy tazalaý júrgizýge, qol gıgıenasyn saqtaýǵa, balalardyń durys tamaqtanyp, dene belsendiligimen aınalysýyna kóńil bólýge keńes beredi. Syrqattanýshylyq kóbeıgen kezeńde sýyq tııý belgileri bar adamdarmen baılanysty shektep, adam kóp jınalatyn oryndarǵa barmaǵan jón.
Dene qyzýy kóterilip, álsizdik, murynnan sý aǵý, murynnyń bitelýi nemese jótel baıqalsa, balany úıde qaldyryp, dárigerge qaratý qajet. Infektsııanyń taralýyna jol bermeý úshin bala tolyq saýyǵyp ketkenshe mektepke, balabaqshaǵa, sport sektsııalary men úıirmelerge barmaýy kerek.
Buǵan deıin tumaý men JRVI taralý kezinde alǵashqy belgiler paıda bolsa ne isteý kerek jáne aýrýdan qalaı saqtanýǵa bolatyny týraly habarlaǵan bolatynbyz.
