Qaraǵandy oblysynda eki adamdy óltirdi degen kúdikke ilingen azamattyń máıiti tabyldy
QARAǴANDY. KAZINFORM - Qaraǵandy oblysynda 38 jastaǵy áıel men onyń balasyn qatygezdikpen óltirý isi boıynsha izdeýde bolǵan er adamnyń máıiti tabyldy. Aldyn ala málimetke sáıkes, ol óz-ózine qol jumsaǵan.
Qaraǵandy oblysy Aqtoǵaı aýdany aýmaǵynda júrgizilgen jedel-izdestirý sharalary barysynda krımınaldyq polıtsııa qyzmetkerleri 39 jastaǵy er adamnyń denesin anyqtady. Atalǵan azamat Qaraǵandy qalasynda áıel men onyń kámeletke tolmaǵan qyzyn óltirý isi boıynsha negizgi kúdikti retinde qarastyrylǵan.
Aldyn ala derekterge súıensek, er adam óz atyna zańdy túrde tirkelgen qarýmen ózine oq atyp, ómirin qıǵan.
Qaraǵandy oblysy Polıtsııa departamentiniń málimetinshe, qazirgi ýaqytta oqıǵanyń barlyq mán-jaıyn jan-jaqty ári tolyq anyqtaýǵa baǵyttalǵan tergeý amaldary jalǵasyp jatyr.
Eske sala keteıik, 26 naýryz kúni Qaraǵandy qalasyndaǵy Krylov kóshesinde ornalasqan páterden 38 jastaǵy áıel men onyń 12 jastaǵy qyzynyń máıiti tabylǵan bolatyn.
Atalǵan derek boıynsha qosarlanǵan kisi óltirý faktisimen qylmystyq is qozǵalyp, kúdiktiniń jeke basy jedel túrde anyqtalǵan edi.
