Qaraǵandy oblysynda eki adam sýǵa batyp kóz jumdy

QARAǴANDY. KAZINFORM - Qaraǵandy oblysynda ruqsat etilmegen oryndarda shomylyp, sýdaǵy qaýipsizdik erejelerin saqtamaý saldarynan eki adam sýǵa ketti. Qaıǵyly oqıǵalardyń birinde kóz jumǵan — kámeletke tolmaǵan bala.

Birinshi oqıǵa Buqar jyraý aýdanynda, Soqyr ózeninde, Zarechnoe aýylynyń mańynda tirkelgen.

— Qutqarýshylar 2009 jyly týǵan er balanyń denesin sýdan alyp shyqty, — dep málimdedi Qaraǵandy oblystyq Tótenshe jaǵdaılar departamentiniń baspasóz qyzmeti.

Ekinshi jaǵdaı Temirtaý qalasynda boldy. Qalanyń tehnıkalyq arnasynan 1969 jyly týǵan er adamnyń máıiti tabylyp, sýdan shyǵaryldy.

Osy oqıǵalarǵa baılanysty Tótenshe jaǵdaılar departamenti turǵyndardy sýdaǵy qaýipsizdik talaptaryn qatań saqtaýǵa shaqyryp otyr. Mamandardyń aıtýynsha, qaıǵyly jaǵdaılardyń deni — ruqsat etilmegen jáne jabdyqtalmaǵan oryndarda shomylýdyń saldary. Jaz mezgilindegi demalys adam ómirine qaýip tóndirmeýi úshin, sý aıdyndaryndaǵy erejelerdi eskerýsiz qaldyrmaý mańyzdy.

Osyǵan deıin Atyraý oblysynda bir aýyldyń 2 jasóspirimi Jaıyqqa batyp ketkeni jaıly jazǵan bolatynbyz.