Qaraǵandy oblysynda egiske bólingen 300 mln teńge jymqyrý deregi tergelip jatyr
ASTANA. KAZINFORM — Qarjylyq monıtorıng agenttiginiń Qaraǵandy oblysy boıynsha departamenti «Keń Dala 2» baǵdarlamasy aıasynda kóktemgi egis jáne egin jınaý jumystaryna bólingen nesıe qarajatyn jymqyrý deregi boıynsha tergeý júrgizip jatyr.
2025 jylǵy mamyrda «Agrarlyq nesıe korporatsııasy» AQ fılıaly men «Rashan» JShS arasynda aınalym qarajatyn tolyqtyrý úshin qaryz berý týraly shart jasalǵan. Shart boıynsha mindettemelerdiń oryndalýyna «Damý» kásipkerlikti damytý qory» AQ kepildik bergen.
Shart talaptaryna sáıkes «Rashan» JShS-niń shotyna 300 mln teńge qaryz qarajaty aýdarylǵan.
- Keıin bul qarajat egis naýqanyna jumsalatyn shyǵyndardy tóleý degen jeleýmen eki JShS-ge bólinip aýdarylǵan. Atap aıtqanda, 148 mln teńgege jýyq qarajat tuqym satyp alýǵa, taǵy 152 mln teńge aýyl sharýashylyǵy tehnıkasyn jalǵa alýǵa, sonyń ishinde janar-jaǵarmaı men eńbekaqy shyǵyndaryna aýdarylǵan.
Alaıda is júzinde tuqym satyp alynbaǵany, tehnıka jalǵa alynbaǵany jáne kórsetilgen jer telimderine aýyl sharýashylyǵy daqyldary egilmegeni anyqtaldy, - delingen QMA habarlamasynda.
«Rashan» JShS dırektory kúdikti dep tanyldy.
Sottyń sanktsııasymen onyń múlkine tyıym salyndy.
Tergeý jalǵasyp jatyr.
Qazaqstan Respýblıkasy Qylmystyq-protsestik kodeksiniń 201-babyna sáıkes, tergeý múddesine baılanysty ózge aqparat jarııa etilmeıdi.
Aıta ketelik Túrkistan oblysynda 103 mln teńge sýbsıdııany jymqyrý isi sotqa joldanǵan edi.
