Qaraǵandy oblysynda egin jınaý naýqany aıaqtalýǵa jaqyn

QARAǴANDY. KAZINFORM - Qaraǵandy óńirinde kúzgi jıyn-terim qyzý júrip jatyr. Aýa raıynyń qubylmaly bolýyna qaramastan, dıqandar bıyl shamamen bir mıllıon tonna astyq jınap, tuqymdyq qordy tolyq qamtamasyz etip, sonymen birge kartop pen kókónisten mol ónim qalyptastyrýdy kózdep otyr.

Bıyl oblysta dándi daqyldarǵa 915 myń gektarǵa jýyq jer bólingen. Onyń basym bóligi – bıdaı (779 myń gektar). Qalǵan alqaptarǵa arpa, suly jáne dándi-burshaq daqyldary egildi. Dıversıfıkatsııa aıasynda maıly jáne mal azyqtyq daqyldarǵa da kóńil bólindi.

25 qyrkúıektegi jaǵdaı boıynsha, egistiktiń 637 myń gektarynan astyq jınalyp, jospardyń 70 paıyzǵa jýyǵy oryndaldy. Ortasha ónimdilik – gektarynan 11,2 tsentner. Qoımalarǵa 715 myń tonnadan astam astyq jóneltildi. Sonymen qatar 20 myń tonnadan asa maıly daqyl, 211 myń tonna kartop jáne 17 myń tonna kókónis alynǵan. Jıyn-terim jumystary qyrkúıektiń sońyna deıin aıaqtalady dep josparlanyp otyr. 

Bıyl kartop alqabynyń kólemi 15 myń gektarǵa jýyqtady. Kókónister 2 myń gektarda ósirildi. Kartoptyń ónimdiligi gektaryna 253 tsentnerden shyqty. Bul – shamamen 271 myń tonna. Mundaı kórsetkish ishki naryqty tolyq qamtyp qana qoımaı, azyq-túlik qoryn qalyptastyrýǵa da jetkilikti.

Aýyl sharýashylyǵy óndirýshilerine dızel otyny lıtri 250 teńgeden jeńildetilgen baǵamen usynylýda. Barlyǵy 20 myń tonna kóleminde janar-jaǵarmaı qarastyrylǵan.

Ónimdi saqtaý máselesinde de alańdaýshylyq joq. Qazirgi tańda oblystyń astyq qoımalary 1,2 mıllıon tonnaǵa deıin ónim saqtaı alady. Al kartop pen kókóniske arnalǵan syıymdylyǵy 340 myń tonna bolatyn 138 arnaıy qoıma jumys isteıdi.

Egin jınaý men keler kóktemgi egis naýqanynyń úzdiksiz ótýi úshin memleket tarapynan qoldaý kórsetilýde. «Keń dala» baǵdarlamasy aıasynda 250-ge jýyq sharýashylyqqa 14 mıllıard teńge kóleminde qarjy bólindi.

Sondaı-aq «QazAgroFınans» arqyly 583 birlik aýyl sharýashylyǵy tehnıkasy satyp alyndy. Bıylǵy sýbsıdııa kólemi 5 mıllıard teńgeni qurap otyr. Bul qarajat tuqym, tyńaıtqysh, pestıtsıd jáne sý jetkizý shyǵyndaryn óteýge baǵyttalǵan.

Osyǵan deıin Memleket basshysy Qasym-Jomart Toqaevtyń Úkimet pen qarjy ınstıtýttarynyń aldyna kóktemgi egis jumystaryn ýaqytynda qolǵa alý týraly mindet qoıyp, osy tapsyrmany júzege asyrý jáne qoldaý sharalaryn jetildirý boıynsha júıeli jumystar aıasynda bıyl «Keń dala 2» baǵdarlamasyna ótinim qabyldaý 2025 jylǵy 1 qazannan bastalatyny jaıly habarlaǵanbyz.