Qaraǵandy oblysynda dala órtinen eki adam kúıip qaldy
QARAǴANDY. KAZINFORM — Qaraǵandy oblysynyń Qarqaraly aýdanyndaǵy órt kezinde eki adam kúıik aldy. Oblystyń birneshe aýdanynda dala órtterin sóndirý jumystary jalǵasyp jatyr, degenmen qatty jel jaǵdaıdy kúrdelendirip otyr.
Qaraǵandy oblysynyń Shet, Aqtoǵaı, Buqar jyraý jáne Qarqaraly aýdandarynda dala órtteri tirkeldi. Órtti sóndirýge 620 adam men 134 tehnıka jumyldyrylǵan.
Qaraǵandy oblysy TJD málimetinshe, Qarqaraly aýdanynda 1989 jáne 1970 jyly týǵan eki er adam medıtsınalyq kómekke júgingen. Olardyń biriniń denesiniń 10%-y, ekinshisiniń 20%-y kúıgen. Qazir ekeýi de aýrýhanada jatyr, jaǵdaılary turaqty dep baǵalanyp otyr.
Eń kúrdeli jaǵdaı Jańatoǵaı aýylynyń mańynda saqtalǵan. Munda eki top jumys istep jatyr, 159 adam men 52 tehnıka jumyldyrylǵan. Jaǵdaıdy baǵalaý úshin áýeden barlaý júrgizildi. Jańa órt oshaqtary anyqtalmaǵan, eldi mekenge qaýip tónip turǵan joq.
Sonymen qatar Besoba aýylynyń mańyndaǵy qystaqtarǵa jaqyn jerde tutanǵan úsh órt tolyq sóndirildi.
Aqtoǵaı jáne Shet aýdandarynda órt aýyzdyqtalyp, jaǵdaı turaqty bolyp otyr.
TJD málimetinshe, órttiń taralýyna qatty jel áser etip otyr. Órt sóndirý jumystaryn úılestirý úshin departamentte jedel shtab jumys istep jatyr.
Tabıǵı órtterdi joıý máselesi Qaraǵandy oblysynyń ákimi Ermaǵanbet Bólekpaevtyń tóraǵalyǵymen ótken apparattyq keńeste qaraldy. Oblys ákimi órt jaǵdaıyn turaqty baqylaýda ustaýdy tapsyrdy.
Buǵan deıin Qaraǵandy oblysynyń Aqtoǵaı aýdanynda myń gektar aýmaqty órt sharpyǵany jaıly habarlaǵan bolatynbyz.
