Qaraǵandy oblysynda bir táýlikte 280 gektar aýmaqtaǵy 4 tabıǵı órt sóndirildi
ASTANA. KAZINFORM – Qaraǵandy oblysynda ótken táýlikte jalpy aýmaǵy 280 gektarǵa jýyq tórt tabıǵı órt sóndirildi, dep habarlaıdy Tótenshe jaǵdaılar mınıstrligi.
Shet aýdanynda Qyzylqoı aýylynan soltústikke qaraı 4 shaqyrym jerde 60 gektar aýmaqta qurǵaq shóp órtengen. Órt tolyǵymen sóndirildi.
Nura aýdanyndaǵy Myńbaev aýylynyń mańynda 75 gektar aýmaqta qurǵaq shóp pen qamys janǵan.
Abaı aýdanynda eki órt oshaǵy tirkeldi. Spassk aýylynyń mańynda 70 gektar aýmaqtaǵy órt sóndirilse, Jamanjol aýylynyń mańynda aldyn ala esep boıynsha 75 gektar aýmaqta qurǵaq shóp janǵan.
– Órtterdi sóndirý jumystary jer bederiniń keıbir ýchaskeleriniń qoljetimsizdigi jáne jeldiń ekpini saldarynan qıyndady. Keıbir baǵyttarda kirme joldardyń bolmaýy órt sóndirý tehnıkasynyń oshaqtarǵa jedel jetýine kedergi keltirdi. Eldi mekenderge qaýip joq, – delingen TJM habarlamasynda.
Tabıǵı órtterdi sóndirýge Qaraǵandy oblysy Tótenshe jaǵdaılar departamentiniń, jergilikti atqarýshy organdardyń, erikti órt sóndirý qurylymdarynyń jáne QR Qorǵanys mınıstrligi áskerı bóliminiń kúshteri jumyldyryldy.
Jalpy órtti sóndirý jumystaryna 150-ge jýyq adam jáne 50-den astam tehnıka qatysty.
Abaı aýdanyndaǵy jekelegen ýchaskelerde órttiń qaıta tutanýyna jol bermeý maqsatynda kezekshilik jalǵasyp jatyr.
TJM turǵyndardy órt qaýipsizdigi talaptaryn qatań saqtaýǵa jáne órt nemese tútin baıqalǵan jaǵdaıda 112 nómirine dereý habarlaýǵa shaqyrdy.
Aıta keteıik, Abaı oblysyndaǵy órtti 300-ge jýyq adam sóndirip jatyr.
