Qaraǵandy oblysynda boryshkerlerge nesıelerin óteýge kómektesedi
QARAǴANDY. KAZINFORM — Qaraǵandy oblysynyń Buqar jyraý jáne Osakarov aýdandarynda pılottyq rejımde «Qaıta bastaý» jobasy iske qosyldy.
«Qaıta bastaý» jobasy aıasynda qaryzy bar adamdar úshin qarjylyq saýattylyq sabaqtary ótkiziledi, turaqty jumys tabýǵa jáne bankterden qaryzdy qaıtarýdyń jeke jáne jaıly sharttaryn alýǵa kómektesedi.
Bul baǵdarlamaǵa 90 jáne odan kóp kún qaryzy bar qaryz alýshylar qatysa alady. Bul rette qaryz somasy mańyzdy emes. Alaıda, eger adamnyń túrli bankter men mıkroqarjy uıymdarynan birneshe qaryzy bolsa, onda oǵan qatysýǵa jol berilmeıdi.
Jumyspen qamtý jáne áleýmettik baǵdarlamalar bólimderi qatysýshylarmen jeke sharttar jasasady, onda kúrdeli qarjylyq jaǵdaıdan shyǵý úshin qajetti barlyq qadam jazylady.
Birinshi kezekte qarjylyq saýattylyq kýrsynan ótý kerek. Ony Amanat partııasynyń «Qaryzsyz qoǵam» jobasy boıynsha ótkizedi. Onlaın da, oflaın formatynda da aınalysýǵa bolady.
Sodan keıin, eger qajet bolsa, boryshkerge jumysqa ornalasýǵa kómektesedi. Bul úshin oblysta tabysty jumys isteıtin birneshe áleýmettik baǵdarlamalar iske qosylady. Olardyń ishinde áleýmettik jumys oryndary, jastar praktıkasy, «Urpaqtar kelisimsharty», «Kúmis jas» jáne «Altyn jas» jobalary, qoǵamdyq jumystar men bıznes-ıdeıalardy iske asyrýǵa arnalǵan granttar bar.
«Qaıta bastaý» jobasynyń qorytyndy kezeńi — bankten nemese mıkroqarjy uıymynan kredıtti óteýdiń jeke sharttaryn alý. Oǵan oqýdan ótken jáne jumys tapqan qatysýshylarǵa jumyspen qamtý jáne áleýmettik baǵdarlamalar bólimderiniń mamandary kómektesedi.
«Qaıta bastaý» jobasynyń qatysýshysy bolý úshin aýyldyq okrýg ákimdigine nemese jumyspen qamtý jáne áleýmettik baǵdarlamalar bólimderine júginý qajet.
Baılanys telefondary:
Osakarov aýdanynyń jumyspen qamtý jáne áleýmettik baǵdarlamalar bólimi — (8-7214) 94-13-74;
Buqar jyraý aýdanynyń jumyspen qamtý jáne áleýmettik baǵdarlamalar bólimi — (8-7215) 42-10-38;
Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasy — (87212) 43-16-75.
Osyǵan deıin, aýyl halqy nege jıi nesıe alatyny týraly jazǵan bolatynbyz.