Qaraǵandy oblysynda bopsalaýmen aınalysqan qylmystyq top quryqtaldy

ASTANA. KAZINFORM – Qaraǵandy oblysynda qala turǵyndaryn qorqytý arqyly aqsha bopsalaýmen aınalysqan uıymdasqan qylmystyq toptyń músheleri ustaldy.

ІІM málimetinshe, qylmystyń aldyn alý jáne uıymdasqan qylmystyq toptardyń jolyn kesý baǵytynda keshendi ári júıeli jumystar júrgizilip jatyr.

- Qaraǵandy oblysy PD uıymdasqan qylmysqa qarsy kúres basqarmasynyń qyzmetkerleri prokýratýra jáne Ulttyq qaýipsizdik komıtetimen birlesip, Balqash qalasynda arnaıy jedel-izdestirý is-sharasyn ótkizgen. Nátıjesinde 13 adam polıtsııa bólimine jetkizilip, olardyń segizi ýaqytsha ustaý ızolıatoryna qamalǵan.

Tergeý barysynda kúdiktilerdiń turǵyndardan 800 myńnan 8 mıllıon teńgege deıin aqsha bopsalaǵany jáne jábirlenýshilerdiń atynan zańsyz nesıe rásimdegeni anyqtaldy, - delingen aqparatta.

Operatsııa kezinde 23 tintý júrgizilip, 26 uıaly telefon, jeti pyshaq, bes avtokólik, eki mıllıon teńgeden astam qarajat, esirtkige uqsas zat salynǵan tórt paket jáne ózge de aıǵaq zattar tárkilendi.

Atalǵan fakti boıynsha sotqa deıingi tergeý amaldary júrgizilýde. Tergeý múddesine baılanysty ózge aqparat jarııa etilmeıdi.

Aıta keteıik, búǵan deıin Qostanaıda bopsalaýmen aınalysqan qylmystyq top ustaldy.