Qaraǵandy oblysynda bilim salasynda 3 myń zań buzýshylyq anyqtaldy

ASTANA. KAZINFORM - Qaraǵandy oblysy bilim berý mekemelerinde kóptegen zańbuzýshylyqtar anyqtaldy, dep habarlaıdy óńirlik prokýratýranyń baspasóz qyzmeti. 

Oblys prokýrory Baýyrjan Myrzakerovtiń tóraǵalyǵymen balalardyń qaýipsizdigin qamtamasyz etý máselelerine qatysty alqa otyrysy ótti.

Sharaǵa oblys ákiminiń orynbasary, memlekettik jáne quqyq qorǵaý organdarynyń basshylary qatysty.

Otyrysty ashqan oblys prokýrory balalardyń quqyqtaryn qorǵaý salasyndaǵy jumystardyń mańyzdylyǵyna toqtalyp, atalǵan baǵytta ótkizilgen tekserýlerdiń nátıjesinde oblys boıynsha sanıtarlyq-epıdemıologııalyq jáne órt qaýipsizdigi, bilim berý, ınklıýzıvti oqytý, farmatsevtıkalyq qyzmet, eńbek qatynastary, obektilerdiń qaýipsizdigi jáne memlekettik satyp alýlar salalarynda 3 myńnan astam zań buzýshylyqtar anyqtalǵanyn atap ótti.

Tekserýlerdiń nátıjeleri boıynsha 400 qadaǵalaý aktisi engizildi, 1,5 myń laýazymdy tulǵa jaýapkershilikke tartyldy, jalpy somasy 100 mıllıon teńge aıyppul salyndy.

117 myń balanyń quqyqtary qorǵalyp, 4 qylmystyq is qozǵaldy, onyń ishinde 1 is boıynsha úkim shyǵaryldy, qalǵandary boıynsha tergeý amaldary júrgizilýde.

Alqa ýákiletti organdardyń óz fýnktsııalaryn oryndaýyna memlekettik baqylaýdy kúsheıtý jáne balalardyń qaýipsizdigin qamtamasyz etýdiń biryńǵaı tásilderin ázirleý mindetin belgiledi.