Qaraǵandy oblysynda bıyl bes kesene qaıta jańǵyrtylady
ASTANA. KAZINFORM — Maqsat — ata-baba murasyn saqtaý ǵana emes, ony jergilikti turǵyndar men qonaqtardyń erkin tamashalaýyna múmkindik jasaý. Qazirgi tańda mamandar Aqtoǵaı, Shet jáne Nura aýdandaryndaǵy mádenı eskertkishterdi qaıta jóndep jatyr. Al Saran mańyndaǵy Igilik bı mazarynyń jumystary tolyq aıaqtaldy.
Munda kesene qabyrǵalary bekitilip, aınalasy retke keltirilgen.
— Bul kesene — tarıhpen etene tanysýǵa úlken múmkindik. Kóptegen mazarlar qaladan shalǵaı ornalasqandyqtan, olarǵa jetý qıynǵa soǵady. Al Igilik bı kesenesi Qaraǵandyǵa jaqyn bolǵandyqtan, kelýshilerge qolaıly, — dep atap ótti Qaraǵandy oblysy Mádenıet, arhıvter jáne qujattama basqarmasynyń Tarıhı-mádenı murany saqtaý ortalyǵynyń bas ınspektory Janbolat Májıtov.
Qazir tórt nysanda jumys júrip jatyr. Shet aýdanynda Oljadáýlen men Baýbek batyr mazarlary abattandyrylyp jatyr.
Aqtoǵaı aýdanynda — Asylbek qorymy, Nura aýdanynda — Shonjar mazary qaıta jóndelýde. Konservatsııalyq jáne restavratsııalyq jumystardy qazan aıynda aıaqtaý josparlanǵan.
— Biz qajet jerlerde qabyrǵalardy qalpyna keltirip, mal kirip ketpeýi úshin qorshaýlar ornatamyz. Bul, bir jaǵynan, tarıhı ári arheologııalyq eskertkishterdi saqtaýǵa sep bolsa, ekinshi jaǵynan, olardy týrıster úshin tartymdy etedi, — deıdi Janbolat Májıtov.
Oblystaǵy arheologııalyq eskertkishterdi qalpyna keltirý jumystary munymen shektelmeıdi. Óńir úshin asa mańyzdy birqatar qorymdar men kesenelerdi abattandyrý josparlanǵan.
Aıta ketelik Qaraǵandy oblysyndaǵy Baıqasqa-2 qorǵanynan erekshe arheologııalyq oljalar tabylǵan edi.