Qaraǵandy oblysynda balyq aýlaýǵa shyqqan úsh adam qaza tapty

QARAǴANDY. KAZINFORM — Qaıǵyly oqıǵa Esen ózeninde bolǵan. Qutqarýshylar eki er adam men bir áıeldiń denesin jaǵadan birneshe metr qashyqtyqtan, sý astynan tapty. Aldyn ala boljam boıynsha, balyqshylar áli tolyq qatpaǵan muz oıylyp, sýǵa túsip ketken.

Qaraǵandy oblysynda balyq aýlaýǵa shyqqan úsh adam qaza tapty
Foto: Kazinform/JI

17 qarasha kúni tańerteń Shahtınsk qalasynyń úsh turǵyny balyq aýlaýǵa attanǵan. Saǵat 06:00 shamasynda 1959 jáne 1963 jyly týǵan eki er adam men 1963 jyly týǵan áıel Borodınovka aýylynan ońtústikke qaraı shamamen 15 shaqyrym jerde ornalasqan Esen ózenine barǵan. Alaıda úsheýi de úıine oralmaǵan.

Joǵalǵan adamdar týraly habar Qaraǵandy oblysynyń tótenshe jaǵdaılar departamentine saǵat 23:40-ta túsken. Qutqarýshylar dereý izdestirý-qutqarý jumystaryn uıymdastyrdy. Іzdeý jumystary túngi ýaqytta júrgizilip, ózen akvatorııasy men jaǵalaý aýmaǵyn túgel tekserý qajettigine baılanysty birshama qıyndaǵan.

— Habar túsken boıda oqıǵa ornyna tótenshe jaǵdaılar departamentiniń kúshteri men quraldary jiberildi. Joǵalǵandardy izdeýge ushqyshsyz ushý apparaty, jylý túsiretin dúrbi, súńgýirlik jabdyqtar jáne Starlink spýtnıktik baılanys júıesi jumyldyryldy. 18 qarasha kúni saǵat 01:18–de qutqarýshylar úsh adamnyń da denesin taýyp, sýdan alyp shyqty, — dep habarlady Qaraǵandy oblysynyń tótenshe jaǵdaılar departamenti.

Marqumdardyń denesi jaǵadan shamamen 10 metr qashyqtyqta, 2,5 metr tereńdikten tabylǵan. Іzdestirý-qutqarý jumystaryna TJD-nyń tórt qyzmetkeri, alty qutqarýshy, kınologııalyq top jáne tórt tehnıka jumyldyryldy. Sonymen qatar izdeý jumystaryna polıtsııa qyzmetkerleri, jergilikti atqarýshy organdardyń ókilderi men joǵalǵandardyń týystary da qatysty.

Aldyn ala málimet boıynsha, muz oıylyp, balyqshylar sýǵa túsip ketken. Olardyń ústinde qutqarý keýdesheleri bolmaǵan. Qazir oqıǵanyń mán-jaıy anyqtalyp jatyr.

Qaraǵandy oblysynyń tótenshe jaǵdaılar departamenti sý aıdyndarynda muz endi qata bastaǵan kezeńde onyń ústine shyǵý asa qaýipti ekenin eskertedi. Tipti jaǵalaýǵa jaqyn jerdiń ózinde muz juqa bolyp, adam salmaǵyn kótere almaýy múmkin.

Qutqarýshylar turǵyndardy áli tolyq qatpaǵan muzdyń ústine shyqpaýǵa jáne balyq aýlaý kezinde qaýipsizdik talaptaryn saqtaýǵa shaqyrady. Ásirese, qutqarý keýdeshesin kııýdiń mańyzy zor.

Eske salaıyq, buǵan deıin ShQO-da bıyl balyq aýlap júrgen 6 adam sýǵa batyp ketkenin jazǵanbyz.