Qaraǵandy oblysynda balasyn ıt talaǵan ana kinálilerge jaza qoldanýdy talap etip otyr
QARAǴANDY. KAZINFORM — Qaraǵandy oblysynyń Buqar jyraý aýdanynda 11 jastaǵy balany óz úıiniń aýlasynda ıt talap, aýyr jaraqat aldy. Balanyń anasy ózine qysym jasalyp jatqanyn aıtyp, oqıǵanyń saldaryna qaramastan istiń jabylyp qalýynan qaýiptenetinin málimdedi.
Qazir Qaraǵandy oblysynda kámeletke tolmaǵan balaǵa ıttiń shabýyl jasaý deregi boıynsha tergeý júrgizilip jatyr. Oqıǵa 1 mamyr kúni Buqar jyraý aýdanyna qarasty Aqtóbe aýylynda bolǵan. Zardap shekken bala ıyǵyndaǵy aýyr tistelgen jaraqatpen jedel túrde aýrýhanaǵa jetkizilgen.
Balanyń anasynyń aıtýynsha, ıt ulyna óz úıleriniń aýlasynda tap bergen.
Áıeldiń sózinshe, janýar balanyń ıyǵyndaǵy teri men bulshyq etti julyp alǵan.
— Súıekteri kórinip turdy. Ulymdy birden aýrýhanaǵa alyp ketti. Ol epılepsııa dertimen aýyrady. Sol sátte ustamasy bastalyp ketse nemese ıt ómirlik mańyzdy aǵzalaryn zaqymdasa ne bolaryn oılaýdyń ózi qorqynyshty, — deıdi zardap shekken balanyń anasy.
Sondaı-aq ol mektep mańynda júrgen balalardyń qaýipsizdigine alańdaıtynyn jetkizdi. Onyń aıtýynsha, ıt mektepke jaqyn jerde ustaldy.
— Bul jerden kún saıyn júzdegen oqýshy ótedi. Mundaı qaıǵyly jaǵdaı kez kelgen balanyń basyna túsýi múmkin. Qazir maǵan aryzymdy qaıtaryp alý úshin qysym kórsetip jatyr. Biraq men basqa balalardyń zardap shekkenin qalamaımyn, — dedi áıel.
Buqar jyraý aýdanynyń ákimdigi bul oqıǵany rastady. Resmı málimetke sáıkes, zardap shekken bala 2014 jyly týǵan.
Aýdan ákimdiginiń habarlaýynsha, ıttiń ıesi 52 jastaǵy jergilikti turǵyn ekeni anyqtalǵan. Oǵan qatysty Ákimshilik quqyq buzýshylyq týraly kodekstiń 407-2-baby 1-bóligi 4-tarmaǵyna sáıkes ákimshilik hattama toltyrylǵan.
Dárigerler balanyń sol jaq ıyq býyny men ıyǵynyń joǵarǵy bóliginde aýqymdy tistelgen jaraqat bar ekenin anyqtaǵan. Oqıǵa bolǵan kúni dárigerler jaraqatqa alǵashqy hırýrgııalyq óńdeý júrgizdi. Qazir bala oblystyq balalar aýrýhanasynda em qabyldap jatyr.
Qaraǵandy oblystyq polıtsııa departamenti atalǵan derek boıynsha ákimshilik is qozǵalǵanyn habarlady.
— Zardap shekken balanyń emi tolyq aıaqtalyp, barlyq qajetti protsessýaldyq sharalar júrgizilgennen keıin túpkilikti protsessýaldyq sheshim qabyldanady, — dep málimdedi Qaraǵandy oblystyq polıtsııa departamentiniń baspasóz qyzmeti.
Sondaı-aq polıtsııa áleýmettik jelilerde taraǵan ıt ıesiniń quqyq qorǵaý organdarynyń qyzmetkeri ekeni týraly aqparatty joqqa shyǵardy. Vedomstvo málimetinshe, bul derekter shyndyqqa sáıkes kelmeıdi.
Osyǵan deıin Almatyda myńnan astam turǵyn janýarlardan zardap shekkeni málim boldy.
