Qaraǵandy oblysynda balanyń basyna kirpish qulap, jansaqtaý bólimine jetkizildi
QARAǴANDY. KAZINFORM - Qaraǵandy oblysynyń Buqar jyraý aýdanynda Mádenıet úıi ǵımaratynyń qasbetinen qaptama materıalynyń bir bóligi opyrylyp túsip, úsh jasar balaǵa zaqym keltirdi. Oqıǵa qoǵamda keń rezonans týǵyzyp, áleýmettik nysandardyń tehnıkalyq jaı-kúıine qatysty alańdaýshylyqty kúsheıtti.
Atalǵan derek boıynsha quqyq qorǵaý organdary sotqa deıingi tergeýdi bastady. Aldyn ala málimetke sáıkes, ǵımarattyń syrtqy qaptamasyndaǵy kirpish qulap, oqıǵa ornynda bolǵan búldirshiniń basyna tıgen. Oqıǵa sáti túsirilgen beıne áleýmettik jelilerde taralyp, jurtshylyqtyń alańdaýshylyǵyn arttyrdy.
Qaraǵandy oblysy Polıtsııa departamentiniń málimetinshe, is Qazaqstan qylmystyq kodeksiniń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» babymen tirkeldi.
– Áleýmettik jelilerde taraǵan beınematerıal negizinde, Buqar jyraý aýdanynda bolǵan oqıǵa boıynsha qylmystyq is qozǵaldy, - dep habarlady vedomstvonyń baspasóz qyzmeti.
Zardap shekken bala jedel túrde medıtsınalyq mekemege jetkizilgen. Qazirgi ýaqytta ol dárigerlerdiń turaqty baqylaýynda.
– Balaǵa qajetti barlyq medıtsınalyq kómek kórsetilip jatyr, - dep naqtylady polıtsııa ókilderi.
Oqıǵa ornynda jedel-tergeý toby jumys istep jatyr. Mamandar bolǵan jaıttyń barlyq mán-jaıyn jan-jaqty ári obektıvti anyqtaýǵa baǵyttalǵan tergeý áreketterin júrgizip jatyr. Buqar jyraý aýdany ákimdigi de jaǵdaıǵa qatysty resmı ustanymyn bildirip, bolǵan oqıǵanyń alańdaýshylyq týǵyzǵanyn atap ótti.
– Mádenıet úıi ǵımaraty mańynda bolǵan bul jaǵdaıdy úlken alańdaýshylyqpen qabyldadyq, - delingen ákimdik habarlamasynda.
Jergilikti atqarýshy organnyń málimetinshe, balaǵa tolyq kólemde medıtsınalyq kómek kórsetilip jatyr jáne onyń jaǵdaıy dárigerlerdiń qatań baqylaýynda. Sonymen qatar ákimdik zardap shekken balanyń otbasymen turaqty baılanys ornatyp, qajetti qoldaý kórsetiletinin jetkizdi.
Aıta keteıik, 2022 jyly atalǵan Mádenıet úıinde aǵymdaǵy jóndeý jumystary júrgizilgen. Endi tergeý aıasynda oryndalǵan jumystardyń sapasy men qaýipsizdik talaptaryna sáıkestigi, sondaı-aq bolǵan jaǵdaıǵa jaýapty tulǵalar anyqtalmaq.
Eske salaıyq, buǵan deıin Astanada turǵyn úı keshenderiniń birinde qaptama men kondıtsıonerdiń qulaýynan zardap shekken jedel járdem feldsheri aýrýhanada kóz jumǵan bolatyn.
