Qaraǵandy oblysynda balalar demalysyna jarty mıllıard teńgeden astam qarjy bólinedi

Óńirde júzdegen mektep janyndaǵy alań men ondaǵan lager ashylady. Al áleýmettik osal sanattaǵy balalardyń demalysyna jarty mıllıard teńgeden astam qarjy baǵyttalmaq.

Qaraǵandy oblysynda sońǵy jyldardaǵy eń aýqymdy jazǵy saýyqtyrý naýqandarynyń biri bastalǵaly otyr. 2026 jyly 1–10 synyp oqýshylarynyń shamamen 96 paıyzyn túrli demalys, bos ýaqytty uıymdastyrý jáne jumyspen qamtý sharalarymen qamtý josparlanǵan.

Óńir oqýshylary úshin jazǵy demalystyń birneshe formaty qarastyrylǵan. Atap aıtqanda, mektep janyndaǵy alańdardan bastap táýlik boıy jumys isteıtin qala syrtyndaǵy lagerlerge deıin uıymdastyrylady. Bıyl jazda barlyǵy 13 qala syrtyndaǵy lager jumys istep, onda 12 myńnan astam bala demalady.

Negizgi qamtý mektep janyndaǵy lagerler men taqyryptyq alańdar arqyly júzege asady. Óńir bıligi dál osy formatqa basymdyq berip otyr. Sebebi bul balalardyń barynsha kóp bóligin qamtýǵa múmkindik beredi.

Tamaqpen qamtamasyz etiletin 281 mektep janyndaǵy lagerde 31 myńnan astam oqýshyny qabyldaý josparlanǵan. Balalar úshin sporttyq, shyǵarmashylyq jáne damytý baǵdarlamalary uıymdastyrylyp, kúndizgi demalys pen tolyqqandy tamaqtaný qarastyrylady.

Budan bólek, jaz mezgilinde tamaqtanýsyz jumys isteıtin 568 beıindik mektep janyndaǵy alań ashylady. Olarǵa 116 myńnan astam bala qatysa alady. Bul alańdarda úıirmeler, sport sektsııalary, zııatkerlik jáne taqyryptyq baǵdarlamalar jumys isteıdi.

Áleýmettik osal sanattaǵy balalarǵa erekshe kóńil bólinedi. Óńirde mundaı sanatqa jatatyn 8 374 bala turady jáne olardyń basym bóligi bıyl jazda tegin demalý múmkindigine ıe bolady. Osy maqsatqa bıýdjetten 509,8 mıllıon teńge bólingen.

Balalardyń kópshiligi – 6 565 oqýshy mektep janyndaǵy lagerlerde demalsa, taǵy 1 191 bala qala syrtyndaǵy saýyqtyrý ortalyqtaryna jiberiledi.

Tegin joldamalar az qamtylǵan jáne kópbalaly otbasylardyń balalaryna, jetim balalarǵa, múgedektigi bar balalarǵa, sondaı-aq qıyn ómirlik jaǵdaıǵa tap bolǵan jasóspirimderge beriledi. Keı jaǵdaılarda olımpıada jeńimpazdaryna da qoldaý kórsetiledi.

Tizimderdi mektepter áleýmettik qorǵaý organdarymen birlesip, ata-analardyń ótinishi men rastaıtyn qujattary negizinde jasaqtaıdy.

Sonymen qatar aqyly joldamalar da qarastyrylǵan. Demalys quny lagerdiń jaǵdaıyna, turý deńgeıine jáne aýysym uzaqtyǵyna baılanysty bolady. Ortasha eseppen joldama baǵasy 20 myńnan 180 myń teńgege deıin ózgeredi.

Jazǵy naýqanǵa óńirdegi iri kásiporyndar da qatysady. Metallýrgııalyq kásiporyndar qyzmetkerleriniń balalary úshin Qarqaraly aýdanyndaǵy jáne Temirtaýdaǵy «Fakel» men «Romantık» lagerlerinde dástúrli túrde demalys uıymdastyrylady. Korporatıvtik baǵdarlamalardyń arqasynda eki myńǵa jýyq bala jazǵy demalysyn saýyqtyrý ortalyqtarynda ótkizedi.

Balany lagerge jiberý úshin ata-analar qajetti qujattar paketin daıyndaýy kerek. Olardyń qatarynda balanyń týý týraly kýáligi nemese jeke kýáligi, ata-ananyń jeke kýáliginiń kóshirmesi jáne medıtsınalyq anyqtamalar bar.

Mindetti qujattardyń qatarynda №071/ý nysanyndaǵy anyqtama, epıdemıologııalyq orta týraly anyqtama, ekpe málimetteri jáne taldaý nátıjeleri bolýy tıis. Lagerge barar aldynda barlyq balalardy dárigerler qosymsha tekserýden ótkizedi.

Lagerlerde qaýipsizdik sharalary kúsheıtiledi dep josparlanyp otyr. Aýmaqta táýlik boıy medıtsına qyzmetkerleri kezekshilik etedi. Sonymen qatar tamaq sapasy men aýyz sý qatań baqylaýǵa alynady. Aýyryp qalǵan balalar úshin arnaıy oqshaýlaý oryndary men jedel medıtsınalyq kómek qarastyrylǵan.

Buǵan deıin Qazaqstannyń Oqý-aǵartý mınıstrligi eldegi jazǵy lagerlerdegi joldama baǵasy qandaı faktorlarǵa baılanysty bolatynyn túsindirgen edi.