Qaraǵandy oblysynda azyq-túlik baǵasyna baqylaý kúsheıtildi

ASTANA. KAZINFORM — 2026 jyldyń basynan bastap Qaraǵandy oblysynyń Saýda jáne tutynýshylardyń quqyqtaryn qorǵaý departamenti áleýmettik mańyzy bar azyq-túlik taýarlaryna baǵanyń negizsiz ósýine jol bermeý boıynsha jumysty kúsheıtti.

ÁMAT tizbesiniń keńeıýine baılanysty bıznes ókilderimen túsindirý sharalary júrgizildi. Baqylaý jumystary 15% saýda ústemesiniń artyq belgilenýiniń aldyn alýǵa jáne ony jedel toqtatýǵa baǵyttalǵan.

Jyl basynan beri ÁQBtK-niń 204-4-baby boıynsha 15 kásipker ákimshilik jaýapkershilikke tartyldy: onyń ishinde 6 kóterme jetkizýshi, 4 sýpermarket jáne 5 shaǵyn dúken. Aıyppuldardyń jalpy somasy 934 myń teńgeni qurady. Quqyqbuzýshylyqtar sút, kúrish, taýyq eti, kúnbaǵys maıy, jumyrtqa, un, tuz, sondaı-aq tizimge jańadan engizilgen áleýmettik mańyzy bar ónimderin satý kezinde anyqtalǵan.

Qosymsha, ÁQBtK-niń 193-baby 4-bóligi boıynsha (baǵa japsyrmalarynyń sáıkes kelmeýi) 2 quqyqbuzýshylyq faktisi tirkeldi.

Máselen, bir kásipker qaraqumyq jarmasyn satyp alý baǵasy 294 teńge bola tura, 370 teńgeden satqan. Saýda ústemesi 26%-dy qurap, belgilengen shekten asqan.

Taǵy bir jetkizýshi qyryqqabatty kelisin 100 teńgeden satyp alyp, saýda jelilerine 135 teńgeden ótkizgen. Saýda ústemesi 35%-ǵa jetken. Júrgizilgen jumystardyń nátıjesinde kóterme jetkizýshide de, saýda jelilerinde de baǵa tómendetildi.

Sonymen qatar, ÁMAT tizimine kiretin qııar, qyzanaq jáne alma boıynsha da zańbuzýshylyqtar anyqtaldy. Atap aıtqanda, bir kásipker almany kılogramyn 300 teńgeden satyp alyp, saýda jelilerine 710 teńgeden ótkizgen. Saýda ústemesi 136%-dy quraǵan.

Anyqtalǵan barlyq faktiler boıynsha kásipkerler ákimshilik jaýapkershilikke tartyldy. Qabyldanǵan sharalardyń nátıjesinde tutynýshylar úshin túpkilikti baǵalar tómendetildi.

Qabyldanǵan sharalar baǵa jaǵdaıyn turaqtandyrýǵa múmkindik berdi: jyl basynan beri birqatar pozıtsııalar boıynsha burynǵy deńgeıge qaraǵanda tómendeý baıqaldy. Mysaly kúrish (93,1%), taýyq eti (92,0%), sút (98,8%), alma (98,3%), tuz (92,2%) deńgeıinde saqtalyp otyr.

Kóterme jáne bólshek saýda baǵalaryna monıtorıng, sondaı-aq elektrondyq shot-faktýralardy taldaý turaqty negizde jalǵasýda. Departament kásipkerlerdi zań talaptaryn saqtaýǵa, al azamattardy baǵany negizsiz kóterý faktileri týraly E-Otinish platformasy arqyly habarlaýǵa shaqyrady. 

Aıta ketelik BQO-da saýda ústemesin asyra belgilegen 9 kásiporyn jaýapqa tartylǵan edi.