Qaraǵandy oblysynda az qamtylǵan aýyl turǵyndaryna mal sharýashylyǵyn damytýǵa kómek beriledi
QARAǴANDY. KAZINFORM - QR Premer-mınıstriniń keńesshisi Eraly Toǵjanov pen Qaraǵandy oblysynyń ákimi Ermaǵanbet Bólekpaev óńirdiń taýar óndirýshilerimen kezdesti.
Olar «Aýyl amanaty» jobasynyń tıimdiligin, kiristerdi arttyrý joldaryn, sonymen qatar fermer bolý múmkindikterin talqylady.
«Aýyl turǵyndary bir jyl ishinde qandaı aýylsharýashylyq ónimderin tutynatynyn bilýińiz kerek. Sol kezde ár ákim ózine ne qajet ekenin, qandaı jobalarmen jumys isteý kerektigin, qansha aqsha bólý kerektigin túsinedi», – dep atap ótti Eraly Toǵjanov.
Jobany iske asyrý joldaryn zertteýde AMANAT partııasy barlyq óńirdi qarastyrǵan. Halyq qalaýlylary aýyldaǵy az qamtylǵan turǵyndar sanyn naqtylap, olardy shaǵyn bızneske tartý, sol arqyly kiristerdi ulǵaıtý jáne jańa jumys oryndaryn qurý joldaryn aıqyndady.
Premer-mınıstrdiń keńesshisi aýylda kooperatıvter qurý máselesine nazar aýdardy. Kezdesýde taýarlyq nesıe baǵdarlamasynyń múmkindikteri týraly aıtyldy. Nesıe alýshy iri sharýa qojalyqtarynan maldy jalǵa alyp, maldyń bir bóligin ózine eńbek aqysy retinde jınaı alady. Memleket bul tarapta kepil retinde jalǵa alynǵan maldy saqtandyrady.
«Maldy ǵana emes, jaıylymdardy, shabyndyq jerlerdi de ózimiz berýge daıynbyz. Bizge de tıimdi, sebebi baza salýǵa kóp aqsha qurtýdyń qajeti joq. 500 basty ustaý úshin 30 mıllıon teńgege baza salý qajet. Ekinshi deńgeıdegi bank nemese basqa qarjy mekemeleri ony qunynyń 100%-na kepilge almaıdy», – deıdi «Nuraı Qaraǵandy» JShS dırektory Serik Júnisov.
Bıyl «Aýyl amanaty» jobasy boıynsha 1300-ge jýyq jańa jumys ornyn quryp, 700-den astam kredıt berý josparlanyp otyr. Shamamen 124 aýyldyq okrýg qamtylady. Aýyl sharýashylyǵy kooperatıvterin qoldaý úshin tehnıka men jabdyqtar satyp alý kózdelgen. Jobalar tek agrarlyq ǵana emes, basqa da taýar óndirisi, týrızm sııaqty salalardy damytýdy josparlap otyr.
