Qaraǵandy oblysynda aýyr júk kólikterinen qandaı zańbuzýshylyqtar jıi anyqtalady

Elimiz boıynsha kóliktik baqylaý qyzmetiniń mamandary respýblıkalyq jáne halyqaralyq mańyzy bar avtojoldarda aýyr júk kólikterine júrgiziletin tekserýlerdi kúsheıtti. Negizgi maqsat – iri kólemdi jáne aýyr salmaqty júkterdi tasymaldaý kezinde belgilengen talaptardyń saqtalýyn baqylaýdy kúsheıtý, avtomobıl joldarynyń saqtalýyn qamtamasyz etý jáne jol qozǵalysy qaýipsizdigin arttyrý.

Qaraǵandy oblysy úshin bul jumystyń mańyzy erekshe. Óńir elimizdegi eń iri kólik toraptarynyń biri sanalady. Oblys aýmaǵy arqyly halyqaralyq jáne respýblıkalyq mańyzy bar avtojoldar ótedi. Osy baǵyttarmen kún saıyn kómir, ken, qurylys materıaldary, metall prokaty jáne ózge de júkter tasymaldanady.

Qaraǵandy oblysy boıynsha Kóliktik baqylaý ınspektsııasy basshysynyń orynbasary Abaı Dármenbaevtyń aıtýynsha, shamadan tys júk artylǵan bir ǵana júk kóligi jol jabynyna myńdaǵan jeńil avtokólikpen birdeı kólemde zııan keltirýi múmkin.

– Qaraǵandy oblysy arqyly júk kólikteriniń óte qarqyndy legi ótedi. Sondyqtan salmaq normalaryn saqtaý máselesi erekshe ózekti bolyp qala beredi. Bizdiń mindetimiz – avtomobıl joldarynyń merziminen buryn búlinýine jol bermeý jáne jol qozǵalysyna qatysýshylardyń barlyǵynyń qaýipsizdigin qamtamasyz etý, – dedi Abaı Dármenbaev.

Inspektorlar kólik quraldarynyń ruqsat etilgen jalpy salmaǵyn asyrý, ostik júktemeniń belgilengen mólsherden artyq bolýy, arnaıy ruqsatsyz aýyr salmaqty júkterdi tasymaldaý, sondaı-aq ruqsat qujattarynda kózdelgen talaptardy saqtamaý sekildi zańbuzýshylyqtardy anaǵúrlym anyqtaıdy.

Aktsııa bastalǵaly Kóliktik baqylaý ınspektsııasynyń qyzmetkerleri shamamen 20 ákimshilik materıal rásimdegen. Onyń ishinde 10 is Qazaqstan Respýblıkasynyń Ákimshilik quqyq buzýshylyq týraly kodeksiniń 571-babynyń 6-bóligi boıynsha tirkelgen.

Osy ýaqytqa deıin salynǵan aıyppuldardyń jalpy somasy 2 mln 768 myń teńgege jetti. Budan bólek, jalpyǵa ortaq paıdalanylatyn avtomobıl joldarymen aýyr salmaqty kólik quraldarynyń júrgeni úshin 537,3 myń teńge kóleminde tólem esepteldi.

Shamadan tys júk tıelgen kólik quraldary tek jol ınfraqurylymyna ǵana emes, jol qozǵalysyna qatysýshylardyń ózderine de úlken qaýip tóndiredi. Ruqsat etilgen salmaqtyń artýy saldarynan kóliktiń tejelý qashyqtyǵy ulǵaıady, basqarylýy qıyndaıdy, shınalarǵa, aspa júıesine jáne tejeý júıesine túsetin júkteme kóbeıedi. Munyń barlyǵy jol-kólik oqıǵalarynyń qaýpin edáýir arttyrady.

Sonymen qatar dál osyndaı shamadan tys júk artylǵan kólikter jol jabynynyń tez buzylýyna sebep bolady. Avtojoldarda oıyq izder, jaryqtar men shógýler paıda bolyp, olardy qalpyna keltirý úshin qomaqty bıýdjet qarajaty qajet bolady.

– Salmaq parametrlerin saqtaý – jaı ǵana formaldy talap emes. Bul – adamdardyń qaýipsizdigi men avtomobıl joldarynyń saqtalýyna tikeleı qatysty másele. Biz úshin tasymaldaýshylardy tek jaýapkershilikke tartý emes, eń aldymen zańbuzýshylyqtardyń aldyn alý mańyzdy, – dep atap ótti Abaı Dármenbaev.

Zańbuzýshylyq anyqtalǵan jaǵdaıda ınspektorlar ákimshilik materıaldar rásimdep, quqyq buzýshylyqtyń sıpatyna qaraı tasymaldaýshylarǵa aıyppul salady. Sonymen qatar aýyr salmaqty kólik quralynyń avtomobıl jolymen júrgeni úshin tıisti tólem esepteledi.

Eger zańbuzýshylyq kólik qozǵalysyna ýaqytsha shekteý engizilgen kezeńde anyqtalyp, dara oske túsetin júkteme belgilengen normadan asyp ketse, kólik quraly zańbuzýshylyq joıylǵanǵa deıin nemese ýaqytsha shekteý merzimi aıaqtalǵansha arnaıy turaqqa qoıylady.

Inspektsııa ókilderiniń aıtýynsha, aktsııanyń aldyn alý baǵytyndaǵy nátıjesi qazirdiń ózinde baıqalyp otyr. Kúsheıtilgen baqylaýdyń mobıldi kóliktik baqylaý beketteri men salmaq parametrlerin avtomatty túrde ólsheıtin stantsııalar arqyly júrgizilip jatqanyn túsingen tasymaldaýshylar tártipke kóbirek baǵyna bastaǵan. Naýqannyń qorytyndy nátıjeleri ol aıaqtalǵannan keıin shyǵarylady.

Buǵan deıin Mańǵystaýda aýyr júk kólikterine jazǵy shekteý engizilgeni jaıly habarlaǵan bolatynbyz.