Qaraǵandy oblysynda aýyl turǵyndarynan marıhýana men gashısh tárkilendi

QARAǴANDY. KAZINFORM — Qaraǵandy oblysynda zańsyz esirtki aınalymynyń jolyn kesýge baǵyttalǵan arnaıy operatsııa júrgizildi, dep habarlaıdy Polisia.kz.

Jedel-izdestirý sharalary barysynda Qaraǵandy oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri óńirdegi aýyldardyń biriniń 45 jastaǵy turǵyny júrgizip kele jatqan avtokólikti toqtatqan. Kólik ishinde júrgizýshiden bólek, onyń 48, 39 jáne 32 jastaǵy úsh aýyldasy bolǵan. 

Tekserý jáne muqııat tintý nátıjesinde iri kólemdegi esirtki zattary anyqtalyp, tárkilendi. Atap aıtqanda, júrgizýshiden 1,3 keli marıhýana tabylsa, 48 jastaǵy jolaýshydan qosymsha 4 keli marıhýana men 112 gramm gashısh alyndy.

Sonymen qatar medıtsınalyq saraptama qorytyndysyna sáıkes, kólik ishindegi barlyq tórt azamattyń da esirtkilik masań kúıde bolǵany anyqtaldy.

Atalǵan derek boıynsha qylmystyq is qozǵaldy. Kúdiktiler ýaqytsha ustaý ızolıatoryna qamalyp, tergeý amaldary júrgizilip jatyr.

Aıta keteıik, Almaty polıtsııasy izdeýde júrgen esirtki taratýshylardy ustaý isine turǵyndardy da tartýdy kózdep otyr.

Al Shymkentte iri esirtki shemasyna qatysy bar 17 adam sottalyp, bireýi aqtaldy.