Qaraǵandy oblysynda aýdandyq máslıhat depýtaty jınalysta temeki tartqany úshin jazalandy
QARAǴANDY. KAZINFORM — Áleýmettik jelilerde taraǵan onlaın-keńes barysynda túsirilgen vıdeo polıtsııanyń nazaryna tústi. Tekserý nátıjesinde oqıǵaǵa Osakarov aýdanynyń ókildi organynyń basshysy qatysqany anyqtaldy.
Polıtsııa qyzmetkerleri áleýmettik jelilerdi monıtorıngileý barysynda Zoom platformasynda ótken onlaın-keńes kezinde túsirilgen beınejazbany anyqtady. Vıdeoda er adamnyń qyzmettik kabınette otyryp, elektrondy temeki tartqany kórinedi.
Polıtsııa qyzmetkerleri beınejazbadaǵy adamnyń kim ekenin anyqtady. Ol Qaraǵandy oblysy Osakarov aýdandyq máslıhatynyń tóraǵasy bolyp shyqty.
Tekserý qorytyndysy boıynsha oǵan qatysty zańnamaǵa sáıkes shara qabyldandy. Er adam ákimshilik jaýapkershilikke tartylyp, aıyppul salyndy.
Qaraǵandy oblysynyń polıtsııa departamenti zań talaptaryn saqtaý laýazymyna, mártebesine nemese qoǵamdyq jaǵdaıyna qaramastan ár adam úshin mindetti ekenin atap ótti.
— Zań men tártip barshaǵa birdeı, eshkimge erekshelik joq, — dep atap ótti vedomstvoda.
Buǵan deıin tikeleı efırler men áleýmettik jelilerdegi quqyqqa qaıshy kontentke turaqty monıtorıng júrgizýdiń biryńǵaı memlekettik júıesin qalyptastyrý kerektigi týraly Quryltaı otyrysynda Mádenıet pen Іshki ister mınıstrlerine saýal joldaǵan depýtat Jarqynbek Amantaıuly aıtqanyn habarlaǵan bolatynbyz.
