Qaraǵandy oblysynda áskerı qyzmetshi iri kólemde esirtkimen ustaldy

ASTANA. KAZINFORM – Qaraǵandy oblysynda eńbek demalysyndaǵy áskerı qyzmetshi iri kólemde esirtki tasymaldaý barysynda ustaldy. Bul faktini quzyrly organdar rastap otyr. 

«10 qarasha kúni «Balqash-Saryshaǵan» tas jolynda patrýldik polıtsııa qyzmetkerlerimen jol qaýipsizdigin qadaǵalaý barysynda, jol júrý erejesin buzý boıynsha (memlekettik tirkeý nómiri bolmaǵan) 31 jastaǵy azamattyń basqarǵan «Geely Coolray» avtokóligi toqtatyldy. Avtokólikti tekserý kezinde, júk salǵyshtan jalpy salmaǵy shamamen 12 keli 18 paketke oralǵan aq tústi untaq zattar tárkilendi. Oqıǵa orynyna jedel-tergeý toby shaqyrylyp, olar tárkilengen zattardyń tıym salynǵan zat ekenin anyqtady», - dep habarlaıdy Qaraǵandy oblysynyń polıtsııa departamentiniń baspasóz qyzmeti.

Aqparatta aıtylǵandaı, atalǵan fakti boıynsha qylmystyq is qozǵaldy. Júrgizýshi ustalyp, ýaqytsha ustaý ızolıatoryna qamaldy. 

«Polıtsııa azamattardyń qaýipsizdigin qamtamasyz etý jáne esirtkiniń taralýyn boldyrmaý jáne esirtki qylmystarynyń jolyn kesý boıynsha kúsheıtilgen jumysty jalǵastyra bermek», - deıdi departamentten. 

Elimizdiń Qurlyq áskerleriniń baspasóz qyzmeti tyıym salynǵan untaq zattarmen ustalǵan áskerı qyzmetshi ekenin rastady. 

«10 qarashada Saryózek garnızonynyń áskerı bólimderiniń biriniń eńbek demalysynda júrgen áskerı qyzmetshisin esirtki tasymaldaý kezinde Ulttyq qaýipsizdik komıtetiniń oblys boıynsha departamentiniń qyzmetkerleri ustady», - degen habar aldyq baspasóz qyzmetinen. 

Atalǵan fakti boıynsha qylmystyq is qozǵaldy, jedel-tergeý is-sharalary júrgizilip jatyr. 

«Qurlyq áskerleri isti obektıvti tergeý maqsatynda quqyq qorǵaý organdaryna járdem kórsetedi», - deıdi áskerı vedomstvodan. 

Buǵan deıin Jambyl oblysynda eki azamattan asa iri kólemde esirtki tárkilengenin habarlaǵan edik.

Birer kún buryn Ulttyq qaýipsizdik komıteti Almaty oblysynda esirtki óndiretin jasyryn zerthananyń jolyn kesti.