Qaraǵandyda asyrap alǵan 5 balany qorlaǵan azamatqa qatysty qylmystyq is qaraldy

QARAǴANDY. KAZINFORM — Qaraǵandyda qamqorlyǵyna alǵan balalardy qorlaǵan Qarqaraly aýdanynyń turǵynyna qatysty sot isi júrip jatyr. Aýdannyń qamqorshylyq organy atalmysh jaıtqa qatysty túsinik berdi, dep habarlaıdy Kazinform agenttiginiń tilshisi.

Qaraǵandy oblysy Qarqaraly aýdanynyń bilim bóliminiń qamqorshylyq organy ókilderiniń sózinshe, qorlyq kórgen jáne uryp-soǵýǵa ushyraǵan balalar bul jaıt týraly psıhologqa aıtqan. Jetimder qamqorshysynan jábir kórgeni jaıly Balalar úıine qaıtarylǵannan keıin ǵana málimdegen. Buǵan deıin balalardyń jaǵdaıyn tekserý kezinde qamqorshy organ mamandary asyraýshy otbasy tarapynan eshqandaı buzýshylyqtar baıqalmaǵanyn aıtady. 

— 2018 jyly ata-anasynyń qamqorlyǵynsyz qalǵan bes bala Qoıandy aýylyna bir otbasyna asyraýǵa berildi. «Neke jáne otbasy týraly» Kodekske sáıkes, qamqorshylyq organdary jylyna eki ret otbasyn tekserip otyrdy. Alaıda, balalar tarapynan nemese turǵyndar tarapynan eshqandaı shaǵym bolǵan joq. Ájesi úsh nemeresine eki ret baryp kelgen, onyń tarapynan da shaǵym bolǵan joq, - dep túsinik berdi «Qarqaraly aýdanynyń bilim bólimi» MM qorǵanshy jáne qamqorshy organynyń bas mamany Saıa Asken. 

Balalardyń ájesiniń aıtýynsha, ol uzaq ýaqyt boıy nemerelerin izdep, keıin olardy 2019 jyly telearnalardyń birinde jarııalanǵan reportajdan kezdeısoq kórip qalǵan. Sodan keıin nemerelerin asyrap alǵan otbasyǵa birneshe ret baryp, balalarmen kezdesken. 

— Bul — meniń jalǵyz ulymnan týǵan nemerelerim. Onyń azamattyq nekede bolǵan áıeli balalardy Balalar úıine tapsyryp jibergen. Ulym qaıtys bolyp, ony jerlegennen keıin men balalardy izdeı bastadym. Biraq maǵan qamqorshynyń meken jaıyn bermedi. Sodan keıin men olardy respýblıkalyq telearnadaǵy reportajdardyń birinen kezdeısoq kórip qaldym. Sodan soń ol jaqqa eki ret bardym. Balalar júdeý kórindi, biraq olar bári jaqsy dep sendirdi. Olardy qamqorshylyqqa alý qujattaryn rásimdeı almadym, sebebi balalar anasynyń atyna jazylǵan, tegi basqa. Bul balalar meniń nemerelerim ekenin dáleldeı almadym. Bıyl advokattardyń kómegimen qamqorshylyqty rásimdedim. Sol kezde nemerelerim asyraýshysynyń tarapynan qandaı qorlyq kórgenin aıtyp berdi, - deıdi balalardyń ájesi.

Belgili bolǵandaı, 2023 jyly 5 búldirshindi asyrap alǵan qamqorshy Qarqaraly aýdanynyń bilim bólimine baryp, balalardan bas tartý týraly ótinish jazǵan. Onda densaýlyǵynyń nasharlaǵanyn áńgimege ózek etken. Ótinishke saı, beseýi balalardy qoldaý ortalyǵyna tapsyryldy. Psıhologpen áńgimelesý barysynda asyrandy búldirshinderdiń qamqorshysynan qorlyq kórgeni belgili boldy. 

— Psıhologqa asyrap alǵan ata-anasynan balalardyń qatygezdik kórgeni aıtyldy. Bul jaıt ákimshilik polıtsııaǵa habarlandy. Qarqaraly aýdandyq polıtsııa bólimi qylmystyq is qozǵady, tergeý sharalary júrgizildi,  dep tolyqtyrdy qamqorshylyq organynyń mamany.

Búgingi tańda úsh bala ájesiniń qamqorlyǵynda, qalǵan ekeýi jetimder úıinde.

Qaraǵandy oblysynyń kámeletke tolmaǵandar isteri jónindegi mamandandyrylǵan aýdanaralyq sotynda qamqorshy asyrap alǵan balalardy qorlaýyna qatysty sot protsesi bastaldy.