Qaraǵandy oblysynda asyl tuqymdy jylqyny urlap, soǵymǵa soıyp alǵandar ustaldy

Qaraǵandy oblysynda taza Arab tuqymdy báıge atyn urlap, soıyp alǵan kúdiktiler ustaldy. Arǵymaqtyń quny 1,5 mln teńge turady, dep habarlaıdy Kazinform agenttiginiń tilshisi.

Qaraǵandy oblysy, Shet aýdandyq polıtsııa bólimine 30 jastaǵy aýdan turǵyny aryzdanyp, belgisiz bireýler halyqaralyq báıgege daıyndap júrgen tulparyn urlap ketkeni týraly habarlaǵan. Jábirlenýshige keltirilgen shyǵyn 1 mıllıon 500 myń teńgeni quraǵan.

«Polıtsııa qyzmetkerleri júrgizgen keshendi jedel-izdestirý is-sharalary barysynda osy iske qatysy bar degen kúdikpen 23 jáne 54 jastaǵy azamattar ustaldy. Olardyń barlyǵy Shet aýdanyndaǵy blok-bekette qolǵa tústi. Kúdiktiler urlanǵan jylqyny soıyp, múshelep tastaǵanyn jetkizdi. Atalǵan fakt boıynsha Qazaqstan Respýblıkasy Qylmystyq kodeksiniń 188-1 babyna sáıkes qylmystyq is qozǵaldy», - dep habarlady Qaraǵandy oblystyq Polıtsııa departamenti Krımınaldyq polıtsııa basqarmasynyń bastyǵy Aslan Óskembaev.

Basqarma bastyǵynyń aıtýynsha, jyl basynan beri, oblys aýmaǵynda 644 bas mal urlanyp, onyń 547-si ıelerine qaıtarylǵan. Mal urlyǵynyń aldyn alý maqsatynda 13 qyrkúıek pen 30 jeltoqsan aralyǵynda oblys aýmaǵynda «Mal urlaýshylar» jedel aldyn alý is-sharasy ótkizilýde. Іs-shara aıasynda óńirdegi avtojoldarǵa 17 jyljymaly beketter qoıyldy.