Qaraǵandy oblysynda ákimdiktiń burynǵy býhgalteri 5 mıllıon teńge jymqyrǵany úshin sottaldy

QARAǴANDY. KAZINFORM – Prokýratýra júrgizgen tekserýdiń nátıjeleri boıynsha Qaraǵandy oblysynda kent ákimi apparatynyń býhgalteri sottaldy. Bul týraly Qaraǵandy oblysynyń prokýratýrasy málim etti.

«Osakarov aýdanynyń prokýratýrasy Molodejnyı kenti ákimi apparatynyń burynǵy býhgalteri 2022-2023 jyldar aralyǵynda ózine jalpy somasy 5 mıllıon teńgeden astam jalaqyny negizsiz eseptegenin anyqtady. Alaıaqtyq faktisi boıynsha prokýratýra qylmystyq is tirkedi», - delingen habarlamada.

Osakarov aýdandyq sotynyń úkimimen Molodejnyı kenti ákimi apparatynyń burynǵy býhgalteri kináli dep tanylyp, 3 jyl 6 aıǵa bas bostandyǵyn shekteý jazasyna sottaldy.

Memleketke keltirilgen shyǵyn tolyǵymen óteldi.